Ամերիկյան Apple ընկերությունը հայտարարել է Mac համակարգիչների և iPad պլանշետների գների բարձրացման մասին՝ դա պայմանավորելով արհեստական բանականության բուռն զարգացման հետևանքով առաջացած հիշողության չիպերի դեֆիցիտով (պակասով)։
Ընկերության հայտարարության համաձայն՝ արհեստական բանականության տվյալների մշակման կենտրոնների արագ ընդլայնումը կտրուկ մեծացրել է հիշողության և պահեստավորման բաղադրիչների պահանջարկը, ինչի հետևանքով դրանց գներն աննախադեպ արագ են աճել։
Արդյունքում թանկացել են Apple-ի մի շարք սարքեր։ Մասնավորապես՝
- MacBook Neo-ի մեկնարկային գինը 599 դոլարից դարձել է 699 դոլար,
- 512 ԳԲ հիշողությամբ MacBook Air-ը՝ 1099 դոլարից դարձել է 1299 դոլար,
- 1 ՏԲ հիշողությամբ MacBook Pro-ն՝ 1699 դոլարից դարձել է 1999 դոլար,
- 128 ԳԲ հիշողությամբ iPad Air-ը՝ 599 դոլարից դարձել է 749 դոլար,
- 256 ԳԲ հիշողությամբ iPad Pro Wi-Fi-ն՝ 999 դոլարից դարձել է 1199 դոլար։
Apple-ից նշել են, որ մինչ այժմ փորձել են հաճախորդներին հնարավորինս զերծ պահել բաղադրիչների թանկացման ազդեցությունից, սակայն այժմ ստիպված են բարձրացնել մի շարք ապրանքների գները։ Վերլուծաբանները կանխատեսում են, որ տարվա ընթացքում կարող են թանկանալ նաև iPhone սմարթֆոնները։ IDC ընկերության վերլուծաբան Նաբիլա Պոպալի գնահատմամբ՝ հատկապես iPhone Pro և iPhone Pro Max մոդելների գինը կարող է բարձրանալ մինչև 200 դոլարով։
