«Տաշիր գրուպ» ընկերության նախագահ Սամվել Կարապետյանի եղբորորդու՝ Նարեկ Կարապետյանի և գործարար Վահե Պարազյանի միջև տեղի ունեցած միջադեպի գործով` Սամվել Կարապետյանին Քննչական կոմիտեն ծանուցում է ուղարկել հարցաքննության հրավիրելու վերաբերյալ:
Այս մասին ասաց ՀՀ քննչական կոմիտեի հասարակայնության հետ կապերի եւ տեղեկատվության բաժնի պետի պաշտոնակատար Նաիրա Հարությունյանը:
«Սամվել Կարապետյանին ծանուցում է ուղարկվել հարցաքննության հրավիրելու վերաբերյալ, սակայն Կարապետյանը հայտնել է, որ ինքը գտնվում է ՌԴ-ում եւ չի կարող ներկայանալ, բացի այդ, ցանկանում է օգտվել Սահմանադրության իր իրավունքից եւ հրաժարվել է ցուցմունք տալուց»,- ասաց Հարությունյանը:
Ավելի վաղ` Քննչական կոմիտեն տեղեկացրել էր, որ առանձնապես խոշոր չափերով շորթման մեղադրանք է առաջադրվել ռուսաստանաբնակ միլիարդատեր Սամվել Կարապետյանի եղբորորդուն՝ Նարեկ Կարապետյանին:
Քննչական կոմիտեից հայտնում են, որ այս տարվա հուլիսի 4-ին՝ ժամը 02:00-ին, հիվանդանոցից ահազանգ է ստացվել, որ իրենց մոտ բուժօգնության է դիմել 30-ամյա տղամարդ՝ մեջքի շրջանի փափուկ հյուսվածքների բազմաթիվ քերծվածքների, ճակատային, ծոծրակային շրջանի փափուկ հյուսվածքների սալջարդ ախտորոշմամբ: Նա պատմել է, որ նախորդ օրը ժամը 19:30-ի սահմաններում բռնության է ենթարկվել Նարեկ Կարապետյանի և նրան ուղեկցող երեք այլ անձանց կողմից, իսկ ժամեր անց՝ գիշերը, Կարապետյանը թվով 10 անձանց հետ իրեն և ընկերոջը ծեծի է ենթարկել, սպանության սպառնալիքներ տալով շորթմամբ պահանջել առանձնապես խոշոր չափի գումար:
Ըստ Քննչական կոմիտեի՝ օբյեկտիվ քննությամբ պարզվել է, որ 28-ամյա Նարեկ Կարապետյանը շորթմամբ առանձնապես խոշոր չափերի գումար հափշտակելու շուրջ նախնական համաձայնության գալով ընկերոջ հետ, վախեցնելու, կամքը ճնշելու նպատակով, հուլիսի 3-ին՝ ժամը 19:30-ի սահմաններում, Երևանի Ալեք Մանուկյան փողոցում բռնություն է գործադրել 30-ամյա տղամարդու նկատմամբ, որից հետո նույն օրը՝ ժամը 22:30-ի սահմաններում, Երևանի սրճարաններից մեկում կրկին հանդիպել է նրա հետ և պահանջել վճարել առանձնապես խոշոր չափի գումար: Մերժում ստանալով՝ Կարապետյանը զանգահարել է տուժողին և հանդիպման կանչել Երևան քաղաքի ռեստորաններից մեկում: Հանդիպման ժամանակ, որին ներկա են եղել նաև այլ անձինք, տուժողի և նրա ընտանիքի անդամների նկատմամբ բռնություն գործադրելու սպառնալիքով շարունակել է պահանջել առանձնապես խոշոր չափի գումարը՝ մի խումբ անձանց հետ դարձյալ բռնություն գործադրելով 30-ամյա տղամարդու և նրա հետ հանդիպման գնացած նրա ընկերոջ նկատմամբ, փոխանցում է Քննչական կոմիտեն:
Ձեռք բերված բավարար ապացույցների հիման վրա Կարապետյանին և նրա ընկերոջը մեղադրանք է առաջադրվել՝ առանձնապես խոշոր չափերով շորթման հատկանիշներով: Նրանց նկատմամբ որպես խափանման միջոց է ընտրվել ստորագրությունը չհեռանալու մասին:
Գործարար Վահե Պարազյանը հայաստանյան մի շարք լրատվամիջոցների պատմել էր, որ բռնության է ենթարկվել Նարեկ Կարապետյանի կողմից, քանի որ հրաժարվել է վճարել 10 միլիոն եվրո:
ՔԿ վարույթում քննվող քրեական գործով Սամվել Կարապետյանին հարցաքննելու ցուցում էր տվել դատախազությունը:
Նարեկ Կարապետյանն էլ լրատվամիջոցների հետ զրույցում հերքել էր իր մասնակցությունը որևէ նման միջադեպի՝ ասելով, որ իրեն ուղղված մեղադրանքները բանսարկություն են:
