«Նախարարը կաշկանդված է պաշտոնական տեղեկատվությամբ, որովհետև մեր երկրում Վիճակագրական կոմիտեն ամենավատ աշխատող կառույցներից մեկն է և այս 30 տարվա մեջ այդ կառույցում այդպես էլ չեն սովորել կազմակերպված աշխատել և ճիշտ տեղեկատվություն տրամադրել, բայց ստիպված հիմնվելով այդ կառույցի տվյալների վրա՝ նախարարը տեղեկատվական տեխնոլոգիաների ոլորտի շրջանառության վերաբերյալ բավականին համեստ ու նվազ ցուցանիշներ է հրապարակել, քան մենք իրականում ունենք։ Նախարարը նշում է, որ ոլորտի աճը տարեկան կազմում է 25 տոկոս և այո´, աճի տեմպը գրեթե նույնն է մեր ունեցած տեղեկությունների հետ, սակայն բազային շրջանառության մասով Արշակյանի ասած տարեկան 250 միլիոն դոլարը գրեթե քառակի անգամ փոքր ցուցանիշ է․ ըստ մեր տվյալների՝ տարեկան շրջանառությունը կազմում է մոտ մեկ միլիարդ դոլար և ըստ մեր ոլորտում առկա դրական դինամիկայի՝ առաջիկայում էլ տարեկան 22-25 տոկոս աճ ենք ունենալու»,- «Առաջին լրատվական»-ի հետ զրույցում տեղեկացրեց Ինֆորմացիոն տեխնոլոգիաների ձեռնարկությունների միության (ԻՏՁՄ) գործադիր տնօրեն Կարեն Վարդանյանը՝ անդրադառնալով Հակոբ Արշակյանի հայտարարությանը։
Հիշեցնենք, որ բարձր տեխնոլոգիական արդյունաբերության նախարար Հակոբ Արշակյանն օրերս լրատվամիջոցներից մեկին տված հարցազրույցում հայտնել էր, որ վերջին հինգ տարիների ընթացքում ՏՏ ոլորտը տարեկան առնվազն 25 տոկոսով աճել է՝ software-ը hardware-ի հետ միասին։ Սակայն նախարարի հրապարակած տվյալներով՝ 2018թ-ի վերջի դրությամբ շրջանառության ծավալը մոտ 250 միլիոն ԱՄՆ դոլար է կազմել, իսկ 2019թ-ի արդյունքները դեռևս ամփոփման և ճշգրտման փուլում են։ Հարցազրույցի ժամանակ Հակոբ Արշակյանը նաև նշել էր, որ ծրագրում են առաջիկա հինգ տարիներին ոլորտում գրանցել առնվազն 60 տոկոս աճ՝ բարձր տեխնոլոգիաների ոլորտի շրջանառությունը հասցնելով 400 միլիոն դոլարի:
Այս համատեքստում Կարեն Վարդանյանը նկատեց, որ Հայաստանում ոլորտի աճի պոտենցիալն ահռելի է և նախարարի նշած 400 միլիոն դոլարը նույնպես հնարավոր է կրկնապատկել՝ 4-5 տարի հետո ունենալով շուրջ 2 միլիարդ դոլար։
Ընդհանուր առմամբ՝ 2019թ-ը ՏՏ ոլորտի համար մեր զրուցակցի համոզմամբ՝ գերազանց տարի էր, որին իր նպաստն է ունեցել նաև հոկտեմբերին Հայաստանում անցկացված Տեղեկատվական տեխնոլոգիաների համաշխարհային կոնգրեսը, որի շրջանակներում Վարդանյանի խոսքերով՝ համագործակցության պայմանավորվածություններ են ձեռք բերվել միջազգային ճանաչում ունեցող բազմաթիվ կազմակերպությունների հետ, որոնցից մեկն էլ համաշխարհային «INFOSIS» խոշորագույն ընկերությունն է։
Մանրամասները՝ տեսանյութում։