Ուկրաինայի նախագահի թեկնածու, «Բատկիվշչինա» կուսակցության առաջնորդ Յուլյա Տիմոշենկոն ցանկանում է Դոնեցկում համաուկրաինական կլոր սեղան անցկացնել: Այս մասին նա հայտնել է ուկրաինական առաջին ալիքի «Շուստեր Live» հաղորդման եթերում:
Տիմոշենկոն հայտարարել է, որ հավատում է կլոր սեղանի արդյունավետությանն ու պայմանավորվածությունների ուժին, որոնք ձեռք են բերվել Ժնևում ապրիլի 17-ին քառակողմ բանակցությունների ընթացքում:
«Բատկիվշչինայի» առաջնորդի խոսքով՝ ինքը կցանկանար, որ Դոնեցկի միջոցառմանը մասնակցեին Արևմտյան և Կենտրոնական Ուկրաինայի հեղինակավոր մարդիկ ու մտավորականության ներկայացուցիչներ:
Նա պատմել է նաև ինքնահռչակ «Դոնեցկի ժողովրդական հանրապետության» ներկայացուցիչների հետ հանդիպման մասին:
«Բազմաթիվ բանակցությունները վկայում են, որ պարզապես բացակայել է քաղաքական ամենաբարձր մակարդակով երկխոսությունն այն մարդկանց հետ, ովքեր այդպես են արտահայտում իրենց դժգոհությունը»,- ասել է «Բատկիվշչինայի» առաջնորդը:
