Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում շարունակվում է Վոլոդյա Ավետիսյանի գործով դատական քննությունը:
Վոլոդյա Ավետիսյանի շահերի պաշտպան Արա Զաքարյանի կողմից մեղադրող Պապիկյանին հայտնած բացարկի միջնորդությունը նախագահող դատավոր Լևոն Ավետիսյանը մերժեց:
Պաշտպանը խնդրեց իրեն տրամադրել դատարանի որոշման օրինակը:
Միաժամանակ պաշտպանը խնդրեց իր պաշտպանյալի նկատմամբ ընտրված խափանման միջոց կալանավորումը փոխել, քանի որ առնվազն Մաթոսյանների դրվագով ընդհանրապես բացակայում է հանցակազմը:
Համաներման ակտը կիրառելի է Վոլոդյա Ավետիսյանի նկատմամբ: Անձին կալանքի տակ պահելու առաջին հիմքը հիմնավոր կասկածն է: Այս պահին իրավական հիմք չկա Ավետիսյանին կալանքի տակ պահելու համար: Պաշտպանը միջնորդեց խափանման միջոց կալանավորումը փոխել կամ փոխարինել գրավով:
Մեղադրող Պապիկյանը նշեց, որ Մաթոսյանների դրվագով դեռ առկա է հիմնավոր կասկած, թե Ավետիսյանը կատարել է հանցավոր գործողություններ, հետևաբար որևէ պատճառ չկա խափանման միջոցը փոխելու:
Արա Զաքարյանը օրինակ բերեց, որի իմաստն այն էր, թե Մաթոսյանները պարզապես Վոլոդյա Ավետիսյանից հետաքրքրվել են, նրանից սպասելիք չեն ունեցել: Կարևոր է տուժողի ընկալումը: Վերջինս պիտի ցանկանա, որ իր համար որոշակի գործողություններ կատարվեն: Խարդախություն կատարողն էլ պիտի ցանկանա այդ տուժողի գույքը հափշտակել:
Տուժողները դատարանում ասել են, որ իրենց համար անընդունելի էր 500 դոլար տալը Ավետիսյանին:
Դատավորը հիշեցրեց, որ պաշտպանը արդեն նման միջնորդություն ներկայացրել է: Պաշտպանի սպասելիքը ո՞րն է, որ դատարանը մի դրվագով արդարացնի՞ ամբաստանյալին:
Ըստ պաշտպանի՝ դատարանը հենց հիմա պարտավոր է անդրադառնալ հիմնավոր կասկածի առկայության հարցին:
Դատարանն էլ վերստին հեռացավ խորհրդակցական սենյակ՝ պաշտպանի այս միջնորդության վերաբերյալ որոշում կայացնելու:
Լուսանկարը՝ Aravot.am-ի
