ՌԱԿ-ում տեղի է ունեցել ատենապետի փոփոխություն։ Նոյեմբերի 10-ին տեղի ունեցած համագումարի ժամանակ կուսակցության ատենապետ Հակոբ Ավետիքյանը հրաժարական է տվել, ընտրությունների արդյունքում նախագահ է ընտրվել Հրաչյա Կարապետյանը, որն էլ կազմել է իր վարչությունը։
Հակոբ Ավետիքյանը «Առաջին լրատվական»-ի հետ զրույցում նշեց, որ ինքն ատենապետ էր դարձել երկուսուկես տարի առաջ և վաղուց էր հայտարարել, որ մտադիր է հրաժարական տալ, որովհետև կուսակցության անդամների միջին տարիքը 46-ն է: «Ես տարիքով եմ, նոր դեմքեր կան, նոր ջահելություն է եկել կուսակցություն, և նրանք պետք է հետզհետե ստանձնեն պատասխանատվությունը։ Կուսակցության ղեկավարությունը պետք է երիտասարդանա, ինչն էլ տեղի ունեցավ»,- նշեց Ավետիքյանը։
Կուսակցությունը, նրա խոսքով, ինչ քաղաքական կուրս որդեգրել է, ըստ երևույթին նույնությամբ կշարունակի, կլինի կառուցողական ընդդիմություն: «Ավելի շուտ՝ դա կձևակերպեի կետային ընդդիմություն, այսինքն՝ ինչ-որ հարցի շուրջ պետք է քննադատական մոտեցում ցուցաբերել, որպեսզի քննադատելին վերանա, և չեմ կարծում, որ նոր վարչությունը զգալիորեն շեղվի դրանից»,- հավելեց Ավետիքյանը։
Հիշեցնենք, որ ատենապետի փոփոխության հարց քննարկվում էր դեռ 2017-ին, երբ խորհրդարանական ընտրություններից առաջ ՌԱԿ ատենապետ Հակոբ Ավետիքյանն ու կուսակցության կենտրոնական վարչության անդամ, փոխատենապետ Լևոն Բլխյանը վեճերի, պարզաբանումների մեջ էին։ Այդ ժամանակ Հակոբ Ավետիքյանը հայտարարել էր «Ծառուկյան» դաշինքին միանալու մասին։ Հակառակ կողմը պնդում էր, որ Ավետիքյանի ղեկավարած Ռամկավար ազատական կուսակցությունն իրավունք չունի հայտարարություններ անելու ՌԱԿ կենտրոնական վարչության անունից:
