Երևանի ընդհանուր իրավասության դատարանի Շենգավիթի նստավայրում շարունակվում է Ռոբերտ Քոչարյանի և մյուսների գործով դատական նիստը։ Դատական նիստի ընթացքում պաշտպանական կողմը հերթական միջնորդությունը ներկայացրեց առ այն, որ դատավոր Աննա Դանիբեկյանն ինքնաբացարկ հայտնի։
Բազմաթիվ փորձագետներ, իրավապաշտպաններ նշում են, որ Ռոբերտ Քոչարյանի պաշտպանական թիմը շարունակում է ձգձգելու մարտավարությունը։ Թեև այս անգամ մերժվեց ինքնաբացարկի միջնորդությունը, սակայն պաշտպանական կողմին հաջողվեց բովանդակային քննարկումները հետաձգել մինչև նոյեմբերի 19-ը։ Ինչի՞ վրա է հույս դրել պաշտպանական կողմը, և ի՞նչ նպատակ է հետապնդում այս ձգձգելու ռազմավարությունը․ «Առաջին լրատվական»-ի հարցին փաստաբան Նորայր Նորիկյանը պատասխանեց․ «Բնականաբար, կիսում եմ փորձագիտական շրջանակների կողմից արտահայտած այն տեսակետը, որ Քոչարյանի պաշտպանական տակտիկան հանգում է հետևյալին՝ ժամանակ շահել մինչև որ ստանան ՄԻԵԴ-ից և Վենետիկի հանձնաժողովից այն խորհրդատվական կարծիքները, որոնց վերաբերյալ Սահմանադրական դատարանը դիմումներ էր ներկայացրել այդ կարևորագույն մարմիններին։ Նրանք փորձում են այդ կարծիքները ստանալուց հետո բեկում մտցնել Մարտի 1-ի քրեական գործի մեջ՝ հասնելով ինչ-ինչ հաջողությունների։
Բայց ես ուզում եմ մի քանի բառով մեր հանրությանը տեղեկացնել, որ, ըստ էության, փորձ է արվում այդպիսի շղարշ ստեղծել, թե ՄԻԵԴ-ը կամ Վենետիկի հանձնաժողովը կարող են Քոչարյանի պաշտպանական թիմին համահունչ եզրակացություններ տրամադրել։
Բայց, այնուհանդերձ, եթե մենք խորամուխ ենք լինում Ռոբերտ Քոչարյանին առաջադրված մեղադրանքի մեջ, պետք է մի պարզ բան արձանագրենք՝ այնուամենայնիվ, այդ դիմումների հիման վրա որոշում կայացնողը Սահմանադրական դատարանն է, և այդ խորհրդատվական կարծիքները պարտադիր բնույթ չեն կրելու։
Ես ուզում եմ՝ մի բանի վրա էլ ուշադրություն դարձնենք նաև։ Երկրորդ մեղադրանքը, որ առաջադրվեց Ռոբերտ Քոչարյանին, ստվերվել է։ Նրան շատ ծանր մեղադրանք է առաջադրվել՝ ՀՀ Քրեական օրենսգրքի 311-րդ հոդվածի 4-րդ մասով, որը դասվում է ՀՀ Քրեական օրենսգրքով սահմանված առանձնապես ծանր հանցագործությունների շարքին։ Այնպես որ, Ռոբերտ Քոչարյանին առաջադրված երկու հոդվածներն էլ դասվում են առանձնապես ծանր հանցագործությունների շարքին։ Եվ բոլոր դեպքերում մեր սահմանադրաիրավական կարգավորումները և առաջադրված մեղադրանքների էությունը հնարավորություն են տալիս հանգելու այն հետևության, որ Ռոբերտ Քոչարյանը բացարձակ անձեռնմխելիություն չունի Հայաստանի Հանրապետությունում։
Իմ խորին պատկերացմամբ և համոզմամբ Ռոբերտ Քոչարյանը եղել է ղարաբաղյան կլանի պարագլուխը, և ժողովրդի աջակցությամբ իշխանության եկած նոր քաղաքական թիմը ճիշտ թիրախ ընտրեց, ուղիղ խփեց նշանակետին և գլխատեց ղարաբաղյան կլանը։ Ես սա ասում եմ իրավական տեսանկյունից։ Ես գտնում եմ, որ ինչ գնով էլ լինի սկսած գործը պետք է ավարտին հասցնել»։
