Իսրայելական իշխանությունները զբոսաշրջիկների և հոգևորականների համար նախօրեին բացել են Քասր ալ-Յահուդ մասում Հորդանան գետի այն մասը, որը սրբվայար է համարվում քրիստոնյաների համար, քանի որ այստեղ, ըստ ավանդության, կնքվել է Հիսուս Քրիստոսը:
Այժմ Քրիստոսի կնքվելու վայրն այցելելու համար հատուկ փաստաթուղթ և զինվորականների կողմից համաձայնեցման անհրաժեշտություն պետք չէ, ինչն արվում էր մինչև հիմա: «Այսօրվանից սկսած զբոսաշրջային այս կենտրոնը բաց է ազատ այցելության համար: Սա 10 տարվա անընդմեջ բանակցությունների և կոորդինացման հետևանք է: Մենք հույս ունենք, որ այն անհամեմատ մեծացնելու է զբոսաշրջիկների քանակը դեպի Իսրայել»,- RIA-Novosti գործակալությանը հայտնել է Իսրայելի զբոսաշրջության նախարարի խորհրդական Ամնոն Լիբերմանը:
Ամնոն Լիբերմանը հավելել է, որ համապատասխան ծառայությունները տարվա մեջ մի քանի անգամ ջրի հետազոտություն են իրականցնում կենտրոնի շրջակայքում: Նախորդ տարվա անբավարար արդյունքները մեծ լարվածություն էին առաջացրել նախարարության և բնապահպանների միջև:
«Ներկա պահին ջուրը գտնվում է նորմալ վիճակում: Հորդանան գետում լողանալն անվնաս է»,- գործակալությանն ասել է զրուցակիցը:
Իսրայելի տարածաշրջանային համագործակցության նախարարն ասել է, որ տուրիստական այս կենտրոնի բացումը դրական նշանակություն կունենա շրջանի տնտեսության վրա և կդառնա Հորդանանի հովտում նոր նախագծերի իրականացման սկիզբ:
«Մենք այժմ բանակցություններ ենք վարում Հորդանանի և Պաղեստինի ինքնավար մարզի հետ համատեղ զբոսաշրջային փաթեթ մշակելու համար»,- ասել է Սիլվան Շալոմը:
Քասր ալ-Յահուդի հատվածը, որը գտնվում է պաղեստինյան Երիքով քաղաքի մոտ, ամեն տարի այստեղ է բերում 100 հազարից ավելի զբոսաշրջիկների և հոգևորականների, իսկ առափնյա այս հատվածը 1967թ.-ից հայտարարվել է «ռազմական գոտի», և այնտեղ մտնելու հնարավորությունը արգելված է եղել տարվա մեծ մաս հատվածում:
