Թեև ԱՄՆ Սենատում Հայոց ցեղասպանության բանաձևի աջակիցների թիվը դարձել էր 24, սակայն հայտնի դարձավ, որ ամերիկացի սենատոր Լինդսի Գրահամը վետո է դրել բանաձևի վրա։ Կոնգրեսի օրենսդրության հիման վրա ցանկացած սենատոր վետոյի իրավունք ունի և կարող է կասեցնել այդ գործընթացը։
Իր որոշումը Գրահամը կայացրել է Թուրքիայի նախագահ Ռեջեփ Թայիփ Էրդողանի հետ հանդիպումից հետո։ Որքանո՞վ էր այս ամենը սպասելի և կանխատեսելի․ «Առաջին լրատվական»-ի հարցին միջազգայնագետ Սուրեն Սարգսյանը պատասխանեց․ «Կարծում եմ՝ շատ սպասելի էր, նաև կանխատեսելի էր։ Ուղղակի այստեղ հարց էր, թե որ սենատորի միջոցով այս քայլին կգնային թուրքական կամ ամերիկյան իշխանությունները։ Քննարկման ժամանակ առևտուր է եղել այս կամ այն հարցի վերաբերյալ։ Կարծում եմ՝ Էրդողանը Միացյալ Նահանգներին ինչ-որ բան է առաջարկել Սիրիայում, որի դիմաց խնդրել է, որպեսզի բանաձևը Սենատում չանցնի։ Հանդիպմանը մի քանի սենատորներ են ներկա գտնվել, որոնց թվում է եղել Լինդսի Գրահամը, որը Թրամփի քաղաքական թիմից է, ու հենց նրա միջոցով էլ այդ վետոն կիրառվել է։
Ընդհանրապես, ցանկացած սենատոր հնարավորություն ունի վետո կիրառել ցանկացած բանաձևի վրա։ Ինչևէ, սա պրակտիկ մեխանիզմ է, շատ հաճախ կիրառվող մեխանիզմ է։ Ի դեպ, պետք է ասեմ, որ բանաձևի աջակիցների թիվը հասել էր 27-ի ու դեռ շարունակում է աճել։ Ճիշտ է, սենատորը վետոն դնում է ու հարցը փակվում է, բայց ցանկացած պահի նա կարող է հետ վերցնել այն ու նորից թույլ տալ, որպեսզի բանաձևը գա քննարկման ու դրվի քվեարկության։ Հիմա, եթե բանաձևի աջակիցների թիվը մեծ լինի ու նրանք կարողանան ճնշում գործադրել Լինդսի Գրահամի վրա, ապա կարող է նա հանի իր վետոն, բայց քննարկման ժամանակ դեմ քվեարկի։ Լինդսի Գրահամն այս պահին ընտրել է վետո կիրառելու տարբերակը, որովհետև, իմ կարծիքով՝ նրանք հասկանում էին, որ մեծ է հավանականությունը, որ այն կանցնի նաև Սենատում»։
Մանրամասները՝ տեսանյութում։
