Ճապոնիայի նոր կայսր Նարուհիտոյի գահակալման կապակցությամբ հանդիսավոր ավտոմոբիլային շքերթ է տեղի ունեցել նոյեմբերի 10-ին Տոկիոյի կենտրոնում, հաղորդում է ՏԱՍՍ-ը:
Ինչպես հայտնի է դարձել, 400 մետր երկարությամբ կորտեժը գլխավոր պալատից ուղևորվել է Ակասակայի նստավայրի ուղղությամբ: Այն գլխավորել է միապետին և նրա կնոջը՝ Մասակոյին տեղափոխող ավտոմեքենան: Նրանց 4.6 կմ ձգվող երթուղով հետևել են ևս 30 ավտոմեքենա՝ կառավարության ներկայացուցիչներով: Նրանց ուղեկցել են նաև 18 մոտոցիկլիստներ և ոստիկանական մեքենաներ:
Նշվում է, որ ճանապարհների երկայնքով, որոնցով անցնում էր երթը, առավոտյան հազարավոր մարդիկ են հավաքվել՝ ցանկանալով ողջունել կայսրին: