Արևմուտքի պետությունները պետք է ռազմական աջակցություն ցուցաբերեն ուկրաինացիներին Ռուսաստանի դեմ պայքարում, որը չի թողնում Ուկրաինայի հերթական տարածաշրջաններ զավթելու փորձը: Նման կարծիք է հայտնել ԱՄՆ նախագահի նախկին խորհրդական և ամերիկացի հայտնի վերլուծաբան Զբիգնև Բժեզինսկին СNN-ի եթերում:
«Ռուսաստանը հաստատում է, որ դա ապստամբություն է, իսկ իրականում ստուգում է՝ կարո՞ղ է զավթել այդ տարածքն առանց մեծ դիմակայության և շարունակել ասել, որ այդ տարածաշրջանն ինքնուրույն է առանձնացել Ուկրաինայից»,-ասել է նա:
«Ես ակնհայտ նմանություն եմ տեսնում մի քանի շաբաթ առաջ Ղրիմում տեղի ունեցածի և այժմ արևելքում տեղի ունեցողի միջև: Առանց ճանաչողական նշանների համազգեստով ավազակների խմբերն անսպասելիորեն հայտնվում են և գրեթե նման են նրանց, ովքեր Ղրիմում էին, և արևելքի մի քանի քաղաքներում փորձում անել նույն բանը, ինչ այնտեղ»,- նշել է վերլուծաբանը:
Բժեզինսկին նշել է, որ դիմակայության դեպքում ռուսները ծրագրում են զորքեր մտցնել, որոնք կենտրոնացած են Ուկրաինայի հետ սահմանին, և նշել, որ իրադարձությունների հետագա զարգացումը մեծապես կախված կլինի հենց ուկրաինացիներից:
Նրա խոսքով՝ Ռուսաստանը, առանց դիմակայության, հերթական ուկրաինական տարածաշրջանների հետ անում է այն, ինչ Ղրիմի հետ, և Արևմուտքը նման դեպքում ակտիվորեն չի միջամտի գործերին:
«Եթե որոշեն դիմակայություն ցուցաբերել, ապա հավանաբար նրանք կպարտվեն քայլ առ քայլ, սակայն եթե այդ դիմակայությունը շարունակվի, ապա Արևմուտքը, դուր գա դա նրան թե ոչ, կլինի հասարակական մեծ ճնշման ներքո՝ նրանց օգնություն ցուցաբերելու»,- ասել է նա:
Բժեզինսկին կոչ է արել հնարավորինս շուտ այդ մասին պաշտոնապես տեղեկացնել ուկրաինացիներին, քանի որ դա նույնպես կարող է նվազեցնել զինված հակամարտության շանսերը:
Բժեզինսկին զուգահեռներ է անցկացրել Ուկրաինայի իրադարձությունների և Վիետնամում ԱՄՆ-ի ու Ռուսաստանի դիմակայության միջև:
«Բավական է մտածել Վիետնամի մասին: Մենք այնտեղ հազարավոր մարդիկ ենք կորցրել, իսկ ո՞վ էր զինում վիետնամցիներին: Ռուսները: Նրանք դրանում ոչ մի վատ բան չէին տեսնում, քանի որ դրանում տեսնում էին իրենց աշխարհաքաղաքական շահը»,- նշել է նա՝ հավելելով, որ Ուկրաինայի դեպքում իրենք կարող են լինել ակտիվ նույն առումով:
