2013 թվականին աշխարհում սպառազինության վրա կատարված ծախսերը կազմել են 1.75 տրիլիոն դոլար, ինչը 1.9 տոկոսով քիչ է 2012-ի համեմատ: Այս մասին են վկայում Խաղաղության խնդիրների հետազոտման Ստոկհոլմի միջազգային ինստիտուտի զեկույցի տվյալները՝ փոխանցում է ITAR-TASS-ը:
Զեկույցում փորձագետները նշում են Արևմուտքում ռազմական ծախսերի շարունակական կրճատման մասին՝ միաժամանակ աշխարհի մնացած բոլոր այլ տարածաշրջաններում գրանցվող աճին զուգահեռ:
15 պետությունների ռազմական ծախսերում ԱՄՆ-ի մասնաբաժինը կազմել է 37 տոկոս: Երկրորդ տեղում Չինաստանն է՝ 11 տոկոս մասնաբաժնով, այնուհետև Ռուսաստանը՝ 5 տոկոս, Սաուդյան Արաբիան՝ 3.8 տոկոս և Ֆրանսիան՝ 3.5 տոկոս:
ԱՄՆ-ում 2013-ին համապատասխան բյուջետային հոդվածը կրճատվել է 7.8 տոկոսով ՝որպես Իրաքի պատերազմի ավարտի, Աֆղանստանից զորքերի դուրսբերման մեկնարկի և 2011-ին Կոնգրեսի կողմից ընդունված բյուջետային միջոցների ավտոմատ կրճատման արդյունք:
Ռազմական ծախսերի զգալի աճ է նկատվում Չինաստանում, Ռուսաստանում և Սաուդյան Արաբիայում: Վերջինս արդեն առաջ է անցնում Մեծ Բրիտանիայից, Ճապոնիայից և Ֆրանսիայից և պատրաստվում է զբաղեցնել ռազմական ծախսերի խոշոր բյուջեներով պետությունների շարքում 4-րդ հորիզոնականը:
Մերձավոր Արևելքում ռազմական ծախսերի ոլորտի առաջատարներն են Սաուդյան Արաբիան և Իրաքը: 2013-ին տարածաշրջանում սպառազինության վրա ծախսվել է 4 տոկոսով ավելի գումար՝ 150 մլրդ դոլար:
Սաուդյան Արաբիան իր ռազմական բյուջեն մեծացրել է 14 տոկոսով (67 մլրդ դոլար), այդ թվում՝ Իրանի հետ հարաբերությունների սրման պատճառով: Ամենամեծ աճը նկատվել է Իրաքում (27 տոկոս), որտեղ շարունակվում է բանակի վերակազմավորումը:
Զեկույցի տվյալներով՝ Աֆրիկայում ռազմական ծախսերն աճել են 8.3 տոկոսով՝ հասնելով 44.9 մլրդ դոլարի: Ալժիրը դարձել է առաջին աֆրիկյան երկիրը, որը հատել է 10 մլրդ դոլարի նշագիծը (8.8 տոկոս աճ):
Ասիայում և Օվկիանիայում ռազմական ծախսերի աճը 2013-ին կազմել է 3.6 տոկոս: Ռազմական նպատակների համար ծախսված ընդհանուր գումարը հասել է 407 մլրդ դոլարի: Չինաստանում գրանցվել է ամենամեծ աճը՝ 7.4 տոկոս (188 մլրդ դոլար):
