Լեհաստանի վարչապետ Դոնալդ Տուսկը, մեկնաբանելով Ուկրաինայի արևելյան շրջաններում վարչական շենքերի զավթման փաստերը, հայտարարել է, որ ուկրաինական իշխանությունները պետք է վճռականորեն վերջ դնեն դրան, փոխանցում է Ունիան-ը:
«Ոչ ոք ուկրաինացիներին չպետք է ծայրահեղ գործողությունների դրդի, պահը հասունացել է, երբ Ուկրաինան այնպես պետք է գործի, որպեսզի ցույց տա, որ այդպիսի որոշումներ չի ընդունում»,- ասել է նա:
Լեհաստանի վարչապետը նշել է, որ ուկրաինական իշխանությունները առաջին հերթին պետք է հույսն իրենց վրա դնեն: «Ոչ մի երրորդ ուժ երկրի պաշտպանությանը այնպես չի մասնակցի, ինչպես ինքը՝ երկիրը: Անիմաստ է սպասել, թե Ֆրանսիան կամ ԱՄՆ-ը Ուկրաինայի ինքնապաշտպանության հարցում ավելի ակտիվ կլինեն, քան ինքը՝ երկիրը»,- ասել է նա:
Միևնույն ժամանակ Տուսկը նշել է, որ ուկրաինացիները կստանան Արևմուտքի աջակցությունը: