Թուրքական Hürriyet թերթի փոխանցմամբ՝ ամերիկացի երկու սենատորներ անհանգստություն են հայտնել Թուրքիայի տարածքում ամերիկյան հակահրթիռային պաշտպանության (ՀՀՊ) համակարգի տարրեր տեղակայելու շուրջ։ Հանրապետական կուսակցության անդամներ Ջոն Քիլն ու Մարկ Քըրքը երեկ նամակ են հղել ԱՄՆ պաշտպանության նախարար Լեոն Պանետային և պետխարտուղար Հիլարի Քլինթոնին։
Նամակում նրանք ուշադրություն են հրավիրում այն հանգամանքների վրա, որ Թուրքիան վատ հարաբերություններ ունի Իսրայելի և լավ հարաբերություններ՝ Իրանի հետ։ Սենատորները կոչ են արել Թուրքիայի տարածքում ամերիկյան ՀՀՊ համակարգի տարրեր տեղակայելու հարցում Անկարայից պահանջել որոշ երաշխիքներ։
Սենատորները կարծում են, որ թուրքական տարածքում տեղակայվելիք ռադիոտեղորոշիչ կայանից (ՌՏԿ) ստացված տվյալները պետք է միաժամանակ հասանելի լինեն Իսրայելի համար։ Այդ ՀՀՊ համակարգն ուղղված է լինելու իրանական հրթիռների դեմ։ Միևնույն ժամանակ, սենատորների կարծիքով՝ ՌՏԿ-ի տեղակայման ամենաիդեալական վայրը Հարավային Կովկասն է։
Հիշեցնենք, որ նախորդ տարվա նոյեմբերի 19-20-ը Լիսաբոնում կայացած ՆԱՏՕ-ի գագաթնաժողովի ժամանակ թուրքական կողմն առաջ քաշեց 3 նախապայման. ա) եթե անգամ ՀՀՊ համակարգն Իրանի դեմ ուղղված նախագիծ է, ապա Լիսաբոնյան որոշման մեջ չպետք է գրավոր նշվի այդ մասին, բ) նախագիծը պետք է ծառայի միայն ՆԱՏՕ-ի անդամ երկրներին. թուրքական տարածքում տեղակայվելիք ՌՏԿ-ից ստացվելիք տեղեկությունները չպետք է հաղորդվեն Իսրայելին` որպես ՆԱՏՕ-ի անդամ չհանդիսացող երկրի, գ) նախագիծը պետք է պաշտպանի ՆԱՏՕ-ի անդամ բոլոր երկրները, ներառյալ Թուրքիան:
Նոյեմբերի 23-ին թուրք լրագրող-վերլուծաբան Բանու Ավարն այդ կապակցությամբ գրել էր. «ԱՄՆ նպատակը գերիշխելն է Թուրքիայի և Չինաստանի միջև ընկած տարածքում, որտեղ գտնվում է աշխարհի էներգետիկ պաշարների 3/4-ը: Հենց դրա համար էլ ԱՄՆ-ն մտավ Աֆղանստան, հարվածեց Իրաքին, այժմ էլ եկել է Թուրքիայի հերթը: Ինչպե՞ս: Հակահրթիռային վահանի միջոցով: Թուրքիան կանհետանա` մտնելով այդ մագնիսական դաշտի մեջ:
Ամերիկյան Patriot PAC-3 հրթիռների հեռահարությունը կազմում է 15-45 կիլոմետր: Ինչպե՞ս պետք է դրանք կանխեն Իրանից եկող հարձակումը: Իսկ դա նշանակում է, որ Patriot-ները տեղակայվելու են թուրքական զինված ուժերի դեմ: Մեր արևմտյան սահմանին ստեղծվել է ԵՄ զինված պահպանությունը, իսկ ահա արևելքում գտնվում է ԱՄՆ վերահսկողության տակ գտնվող Քրդստանի աշխատավորական կուսակցությունը (PKK): Փաստորեն, մենք գտնվում ենք երկու քարի արանքում»:
