Վարչապետ Նիկոլ Փաշինյանի գաղտնի հանձնարարականով էականորեն բարձրացել են նախարարների, փոխնախարարների և նախարարությունների գլխավոր քարտուղարների աշխատավարձերը։ Հանձնարարականը տրվել է հուլիս ամսին։
«Հետքի» փոխանցմամբ՝ պետական պաշտոն զբաղեցնող անձանց աշխատավարձի չափը սահմանված է օրենքով։
«Պետական պաշտոններ զբաղեցնող անձանց վարձատրության մասին» ՀՀ օրենքով նախարարի աշխատավարձի գործակիցը 12 է։ Նախարարի աշխատավարձը ստանալու համար այդ թիվը պետք է բազմապատկել բազային աշխատավարձով՝ 66 հազար 140 դրամով։ Հանրագումարը 793 հազար 680 դրամն է, որի մեջ ներառված են հարկերը։
Մինչդեռ, առանց օրենքում փոփոխություն կատարելու, վարչապետի գաղտնի հանձնարարականով նախարարի աշխատավարձը կրկնապատկվել է և դարձել 1.5 միլիոն դրամ։
Նույն պատկերն է փոխնախարարների և գլխավոր քարտուղարների աշխատավարձերի դեպքում։ Օրենքով սահմանված գործակցով փոխնախարարի աշխատավարձը 562 հազար 160 դրամ է, որը դարձել է 1 միլիոն 60 հազար դրամ։ Գլխավոր քարտուղարի աշխատավարձը 595 հազար 260 հազար դրամից դարձել է 870 հազար դրամ։
Քաղտեխնոլոգ Վիգեն Հակոբյանն «Առաջին լրատվական»-ի հետ զրույցում նկատեց՝ սա լավ նախադեպ չէ և նույնիսկ տենդենց դառնալու վտանգ է պարունակում. «Որովհետև երկակի ստանդարտներ է կիրառվում՝ ասում է մի բան, անում մի այլ բան։ Ոմանց դեպքում մի տեսակի ստանդարտներ են հռչակում, բայց յուրայինների համար՝ այլ։ Սովորաբար սրանից են սկսում արատավոր երևույթները, որոնք էլ երբեմն բերում են նրան, որ համակարգը մերժվում է հասարակության կողմից»։
Հակոբյանը շարունակեց. «Մենք գիտենք, որ կառավարության նիստում լինում են հրապարակային գաղտնի քննարկվող հարցեր։ Փաստորեն ստացվում է՝ գաղտնի հարցերի մեջ կարող են լինել ոչ թե պետական անվտանգությանը վերաբերող հարցեր, այլ գաղտնի ռեժիմով թիմի անդամներին պարգևատրելու հարցեր։ Սա, կրկնում եմ, վատ նախադեպ է, երկակի ստանդարտ, և, ըստ իս՝ զգալիորեն կարող է սասանել վստահությունը գործող իշխանությունների խոսքի, հռչակվող կարգախոսների նկատմամբ»։
Միևնույն ժամանակ քաղտեխնոլոգն ընդգծեց. «Այն, որ Հայաստանում պաշտոնյաների աշխատավարձերը հեռու են բավարար լինելուց՝ դա փաստ է։ Նրանցից պահանջել 7/24 ռեժիմով աշխատանք՝ իրականությունից զուրկ է։ Ես բազմիցս նշել եմ, որ նրանց աշխատավարձը պետք է բարձր լինի, նույնիսկ համադրելի մասնավոր սեկտորի հետ։ Այդ մասին ես նշել եմ, երբ շատերը դատապարտում էին պարգևատրումները, բայց ճիշտ չէ հրապարակել մի սկզբունք ու առաջնորդվել գաղտնիությամբ, դա կարող է շատ ավելի տխուր երևույթներով ու հետևանքներով հղի լինել, որին մենք ականատես ենք եղել մեր անկախ պետության բոլոր տարիներին»։
