«Եթե Սահմանադրական դատարանը նախկին իշխանությունների վերջին բաստիոնն է, ապա ոչ պակաս վերջին բաստիոն է և ավելի հզոր բաստիոն Արցախը՝ անկասկած պայմանավորված արտաքին գործոնով»,- «Առաջին լրատվական»-ի հետ զրույցում ասաց նախկին քաղբանտարկյալ, քաղաքագետ Արկադի Վարդանյանը՝ անդրադառնալով Արցախից նախկին պաշտոնյաների պարբերաբար հնչող հոխորտանքներին:
Նրա խոսքով՝ բալասանյանների և մյուսների հայտարարությունները սնուցվում են Ռուսաստանից. «Ես չեմ կարծում, որ Վիտալի Բալասանյանը այդքան գայլի սիրտ է կերել նման լկտի պահվածք ցուցաբերելու համար: Իմիջիայլոց, նրա վերջին հարցազրույցը ուղղակի վայրահաչություն էր, զառանցանք էր՝ առանց բովանդակության և առանց տրամաբանության: Մենք որևէ նոր բան չլսեցինք նրա խոսքում՝ նույն արտահայտությունները, նույն բանաձևերը, նույն դեմքի արտահայտությունը: Եվ չեմ կարծում, որ դրան պետք է այդքան մեծ ուշադրություն դարձնել»:
Նախկին քաղբանտարկյալը կարծում է, որ Ռուսաստանի համար մեծ վտանգ է ներկայացնում Հայաստանում տեղի ունեցած հեղափոխությունը՝ այն առումով, որ գնալով ավելի ու ավելի մեծ ազդեցություն է գործում նախկին խորհրդային այն հանրապետությունների ժողովուրդների վրա, որոնք դեռևս գտնվում են Ռուսաստանի ազդեցության ներքո. «Ուստի Ռուսաստանը փորձում է ցանկացած մեթոդով ճնշել Հայաստանի ժողովրդավարությունը և թույլ չտալ ՀՀ ճանապարհը դեպի քաղաքակիրթ աշխարհ: Եվ շատ հարցերում դա նրանց հաջողվում է: Տեսեք՝ ՍԴ հանգույցը մինչև հիմա չի քանդվում»:
Արկադի Վարդանյանի խոսքով՝ ՍԴ որոշումը յուրատեսակ ապտակ էր ՀՀ գործող իշխանությանը. «Սահմանադրական դատարանը դրանով ցանկացավ հանրությանը ցույց տալ, որ այս բաստիոնը շատ ամուր է և մեկ-երկու շարժումներով հնարավոր չէ քանդել»:
Հարցազրույցն ամբողջությամբ՝ տեսանյութում: