Ադրբեջանական 1news.az-ի փոխանցմամբ՝ Թուրքիան ձեռնամուխ է եղել ադրբեջանցի մասնագետների մշակած «Իսթիքլալ» (IST-12.7) դիպուկահար հրացանի արտադրությանը, որի տրամաչափը կազմում է 12.7 միլիմետր։ Այս մասին հայտարարել է թուրքական քիմիական արդյունաբերության և մեխանիկայի ընկերությունը (MKEK):
Դիպուկահար հրացանն արտադրվելու է MKEK-ի ձեռնարկություններում և մի փոքր տարբերվելու է իր բնօրինակից։ Այն կատարելագործվելու է թուրք և ադրբեջանցի մասնագետների մասնակցությամբ։ Նոր տեխնոլոգիաների կիրառման շնորհիվ նախատեսվում է նվազեցնել զենքի քաշը, երկարացնել փողի կյանքը, ինչպես նաև հեշտացնել զենքի կիրառումը։
Զենքը կշռում է 16 կիլոգրամ, իսկ հեռահարությունը կազմում է 2000 մետր։ Թուրքիայում արտադրված IST-12.7-երը նախևառաջ կառաջարկվեն Թուրքիայի զինված ուժերին, ապա նաև արտասահմանյան երկրներին։
