ԱՄՆ նախագահ Դոնալդ Թրամփը Twitter-ի իր էջում հայտարարել է, որ ԱՄՆ նախկին պետքարտուղար, 2016-ի նախագահական ընտրություններում նրա մրցակից Հիլարի Քլինթոնը, պետք է մասնակցի նախագահական նոր մրցավազքին:
«Ես գտնում եմ, որ կոռումպացված Հիլարի Քլինթոնը պետք է մտնի մրցարշավ (նախագահական), որպեսզի փորձի (հաղթել) և գողանա (այդ հնարավորությունը) ծայրահեղ ձախ Էլիզաբեթ Ուորենից»,- գրել է Թրամփը:
Նա նշել է, որ դրա համար Քլինթոնը պետք է բացատրի իր բոլոր «ծանր հանցագործություններն ու չարաշահումները», ինչպես նաև նշի կոնգրես ներկայանալու ծանուցում ստանալուց հետո 33 հազար էլեկտրոնային նամակների հեռացման պատճառներն ու հանգամանքները:
Ավելի վաղ հաղորդվել էր, որ ամերիկացի սոցիոլոգների կողմից անցկացված հասարակական կարծիքի հարցումների արդյունքների համաձայն, դեմոկրատներից ԱՄՆ նախագահի թեկնածուների շարքում առաջին տեղն է գրավել սենատոր Էլիզաբեթ Ուորենը:
Նա ամերիկյան լրատվամիջոցների կողմից դիտվում է որպես Թրամփի ամենահավանական հակառակորդներից մեկը 2020-ին, չնայած անբավարար քաղաքական փորձին և մի շարք հարցերի վերաբերյալ հակասական դիրքորոշմանը, այդ թվում՝ Ռուսաստանի մասով: