ՄԱԿ-ի փորձագետները կոչ են արել արգելել կաշվե իրերի, գործվածքների, չկպչուն տապակների, թղթի և տպիչի թանաքների մեջ հայտնաբերված վտանգավոր քիմիական նյութերի օգտագործումը: Ըստ ՄԱԿ-ի նորությունների կենտրոնի, perfluorohexanoic sulfonic acid-ը (PFHSA), դրա աղերը և հարակից միացությունները լուրջ սպառնալիք են մարդու առողջության և շրջակա միջավայրի համար, բայց լայնորեն օգտագործվում են շատ սպառողական ապրանքների արտադրության մեջ:
Ինչպես նշում են մասնագետները, PFHSA-ը և դրա հարակից միացությունները կարող են բացասական ազդեցություն ունենալ մարդու նյարդային համակարգի, ուղեղի, էնդոկրին համակարգի և վահանաձև գեղձի գործունեության վրա:
Այս նյութերը վերացնելու որոշումը կայացվել է Հռոմում՝ Կայուն օրգանական աղտոտող նյութերի վերանայման հանձնաժողովի 15-րդ նիստի շրջանակներում: Հանձնաժողովը բաղկացած է Կայուն օրգանական աղտոտող նյութերի կոնվենցիայի մասնակից պետությունների ներկայացուցիչներից: Հանդիպմանը մասնակցում էին ավելի քան 100 գիտնական:
«Այս որոշումը կայացվել է ամբողջ աշխարհի փորձագետների կողմից անցկացված գիտական ուսումնասիրության հիման վրա: Նրանք եկել են այն եզրակացության, որ Ստոկհոլմում Կայուն օրգանական աղտոտող նյութերի կոնվենցիայի ցանկում PFHSA-ի ընդգրկումը կպաշտպանի շրջակա միջավայրը և մարդու առողջությունը», – ասում է Կոնվենցիայի քարտուղարության գործադիր քարտուղար Ռոլֆ Փեյը: