«Վարկերի արդյունավետությունը արդյունաբերական տեսանկյունից բավարար չէ»,- այսօր ասուլիսում նման կարծիք հայտնեց Հայրենական ապրանքարտադրողների միության նախագահ Վազգեն Սաֆարյանը:
ՀՀ արտաքին պարտքը ներկայումս 3.7 մլրդ դոլար է, 400 մլն դոլարի վարկ սպասվում է «Նաիրիտ» գործարանի համար: Ըստ Վ. Սաֆարյանի՝ ներգրավված միջոցները տնտեսության հիմնական ճյուղի`արդյունաբերության վրա քիչ են ծախսվել: Համեմատաբար ազատ ռուսական վարկից` 500 մլն դոլարից, ընդամենը 15 մլն է հատկացվել Զանգեզուրի պղնձամոլիբդենային կոմբինատին, իսկ մնացած միջոցները ծախսվել են ենթակառուցվածքների զարգացման համար: ՀԲ և ԱՄՀ վարկերը նպատակային են: Բանախոսի խոսքերով, ԱՄՀ 54 մլրդի վարկը շատ ծանր է` կարճաժամկետ և բարձր տոկոսներով: Այս տարի վարկերի սպասարկմանը կուղղվի 118 մլն դոլար: Վ. Սաֆարյանը շեշտեց, որ եթե կտրուկ քայլեր չձեռնարկվեն ՀՆԱ-ն մեծացնելու համար, ապա մի քանի տարի անց բյուջեի ծախսային մասի 25%-ը կգնա արտաքին պարտքի սպասարկմանը:
«Այս տարի հավաքագրելու ենք 650 մլրդ դրամի հարկեր, որոնց 50% լինելու է ԱԱՀ հարկը, որի մոտ 70% հարկվելու է սահմանի վրա: Սա ֆիսկալ, տնտեսությունը չզարգացնող հարկեր են: Իսկ տնտեսության զարգացումը բնութագրող շահութահարկն ու եկամտահարկն ընդամենը 26-27% են, այն դեպքում, երբ Արևմտյան Եվրոպայի երկրներում սրանք շուրջ 80% են կազմում»,- ասաց Վ. Սաֆարյանը` կարևորելով, որ հարկային քաղաքականության մեջ անցում կատարվի անուղղակի հարկերից ուղղակի հարկերով բյուջեն համալրելուն:
Միության նախագահն անհրաժեշտություն է համարում ՀՀ-ում արդյունաբերության վերականգնման մասին օրենքի ընդունումը: Թեև երկրի արդյունաբերությունը սկսել է աշխուժանալ և հունվար-մայիս ամիսների կտրվածքով 25% աճ է արձանագրվել, սակայն Վ.Սաֆարյանը դա ուրախալի չի համարում, որովհետև պետությունը պետք է ընդունի Արդյունաբերության քաղաքականության հայեցակարգ, որում պետք է նախանշվեն այն հիմնական ուղղությունները, որոնք ՀՀ-ում պետք է զարգանան` գունավոր մետալուրգիա (Զանգեզուրի պղնձամոլիբդենային կոմբինատի բազայի վրա պղնձաձուլարանի ստեղծում), սև մետալուրգիա, քիմիայի ու դեղերի արդյունաբերություն, ադամանդագործություն, ոսկերչություն, մեքենաշինություն:
«Առաջին լրատվականի» հարցին, թե ե՞րբ է սկսվել հայեցակարգի մշակումը և ինչո՞ւ այն չի ընդունվում՝ Վ. Սաֆարյանը պատասխանեց, որ առաջին անգամ արդյունաբերության զարգացման հայեցակարգի ուրվագիծը կառավարությունում քննարկվել է 2010 թ. հունվարի 23-ին, ապա վերադարձվեց Էկոնոմիկայի նախարարություն` լրամշակման համար, 2010 թ. դեկտեմբերի 14-ին վարչապետի հետ հանդիպման ժամանակ Տիգրան Սարգսյանն ասել է, թե այն կընդունվի 2011-ի առաջին եռամսյակում, հետո ժամկետը երկարաձգվել է մինչև առաջին կիսամյակ, սակայն դեռ պատրաստ չէ: «Առանց այդ խնդրի լուծման ՀՀ տնտեսությունը չի կարող էական զարգացում ունենալ»,- գտնում է Վ. Սաֆարյանը:
Կառավարման փորձագետ Հարություն Մեսրոբյանի կարծիքով, միայն լավ օրենքները բավարար չեն. «Խոսքը գնում է կառավարման համակարգը ուղղակի ջարդելու և նորը ստեղծելու մասին: Եթե ունես օլիգարխիկ տնտեսություն, ոչ մի ծրագիր, ոչ մի օրենք չի աշխատելու: Մարդկության պատմությունը ցույց է տվել, որ դրանք ջարդվում են 2 եղանակով` երկրի առաջին դեմքի կոշտ քաղաքական կամք և ժողովրդի ընդվզում»:
