Թուրքիան ինտենսիվ դիվանագիտական կապեր է հաստատում՝ 2015-2016 թվականներին ՄԱԿ-ի Անվտանգության խորհրդում ժամանակավոր անդամի կարգավիճակ ստանալու համար: Այս մասին գրում է Trend-ը:
Թուրքիայի ԱԳ նախարար Ահմեդ Դավութօղլուն այդ նպատակով բանակցություններ է անցկացրել ավելի քան 80 երկրների ներկայացուցիչների հետ և լավատեսորեն է տրամադրված:
Դավութօղլուն արդեն 3 օրվա ընթացքում Նյու Յորքում հանդիպել է Քաղաքակրթության միության բարեկամության խմբի հետ: Այնուհետև նա հանդիպել է Կարիբյան համագործակցության անդամ-երկրների մշտական ներկայացուցիչների հետ, նաև Աֆրիկյան խմբի ներկայացուցիչների հետ:
Վերջին հանդիպումները Դավութօղլուն անցկացրել է Խաղաղ օվկիանոսի կղզի-պետությունների մշտական ներկայացուցիչների հետ:
Ավելի քան 80 երկրների հետ բանակցություններում Դավութօղլուն ներկայացրել է, թե Թուրքիան ինչպիսի ներդրումներ կարող է կատարել ամբողջ աշխարհում խաղաղության համար, եթե նրան հաջողվի դառնալ Անվտանգության խորհրդի անդամ:
Թուրքիայի, ինչպես նաև Նոր Զելանդիայի և Իսպանիայի թեկնածության վերաբերյալ քվեարկությունը տեղի կունենա ՄԱԿ-ի Գլխավոր ասամբլեայում՝ հոկտեմբերին:
