Սաուդյան Արաբիայի թագավոր Սալման Բին Աբդել Ազիզ Ալ Սաուդի անձնական թիկնապահ, բրիգադային գեներալ Աբդել Ազիզ Ալ-Ֆահմը սպանվել է հրազենային վիրավորումից: Այս մասին հայտնում է Al Arabiya-ն՝ հղում անելով Մեքքայի ոստիկանությանը:
Նշվում է, որ գեներալ Ալ-Ֆահմին կրակել են շաբաթ օրը իր ընկերոջ՝ Թուրքի Բին Աբդել Ազիզ աս-Սաբթի տանը, Ջիդա քաղաքում: Այնտեղ նա կոնֆլիկտ է ունեցել ևս մեկ հյուրի՝ Մամդուխ բեն Մեշալ Ալ Ալիի հետ: Վիճաբանությունից հետո Մամդուխը տանից դուրս է եկել և վերադարձել արդեն զենքով՝ անկանոն կրակ բացելով բոլոր նրանց վրա, ովքեր տանն են եղել:
Ալ-Ֆահմը ծանր վնասվածք է ստացել և մահացել է հիվանդանոցում: Եվս երկու մարդ տուժել են, այդ թվում՝ տան տերը: Երբ ոստիկանությունը ժամանել է դեպքի վայր, հանցագործը հրաժարվել է հանձնվել և սպանվել է իրավապահ մարմինների աշխատակիցների կողմից: Փոխհրաձգության հետևանքով 5 ոստիկան վնասվածք է ստացել:
Գեներալ Աբդել Ազիզ Ալ-Ֆահմը երկար տարիներ աշխատում էր Սաուդյան միապետությունում: Նա եղել է Սաուդյան Արաբիայի հանգուցյալ թագավոր Աբդալլայի անձնական թիկնապահը, հետագայում եղել է Սալման թագավորի անձնական թիկնապահը և համարվել աշխարհում լավագույնը իր գործում:
