Քենթերբերիի արքեպիսկոպոս Ջասթին Ուելբին նախազգուշացրել է, որ եթե Անգլիայի եկեղեցին համաձայնվի միասեռական զույգերի ամուսնության ծես կատարել, դա աղետալի հետևանքներ կունենա այն երկրների քրիստոնյաների համար, որտեղ համասեռամոլությունն արգելված է՝ հայտնում է BBC-ի ռուսական ծառայությունը:
Մեկ շաբաթ առաջ Անգլիայում և Ուելսում օրինականացվել են միասեռական ամուսնությունները: Անգլիկան եկեղեցու հոգևոր առաջնորդները հայտարարել են, որ ընդունում են ստեղծված իրավիճակը և դեմ հանդես չեն գա միասեռական ընտանիքներին, բայց նախկինի պես կարծում են, որ «ամուսնությունը տղամարդու և կնոջ հավերժական միությունն է»:
Քենթերբերիի արքեպիսկոպոսի խոսքով՝ ինքը տեսել է, թե ինչ ձև է ստանում Հարավային Սուդանում քրիստոնյաների նկատմամբ բռնությունը, որտեղ քրիստոնեությունը ոմանց շրջանում ասոցացվում է համասեռամոլության հետ, ուստի գիտակցում է միակողմանի գործողությունների վտանգավորությունն այնպիսի հարցերում, ինչպես նույնասեռ ամուսնություններն են:
Նա նաև ասել է, որ եկեղեցու կողմից միասեռական ամուսնություններն ընդունելը դժվարություններ կստեղծի Պակիստանի և Նիգերիայի քրիստոնյաների համար:
