ՀՀ փոխվարչապետ, տարածքային կառավարման նախարար Արմեն Գևորգյանը շարունակում է այցելությունները մարզեր՝ ցրտահարության հետևանքով ստեղծված իրավիճակին և առկա խնդիրներին տեղերում ծանոթանալու նպատակով:
Այսօր Ա. Գևորգյանը, գյուղատնտեսության նախարար Սերգո Կարապետյանի, մարզպետ Կովալենկո Շահգալդյանի ուղեկցությամբ այցելել է Կոտայքի մարզի Քանաքեռավան, Մրգաշատ համայնքներ, եղավ ցրտահարությունից տուժած այգիներում, հանդիպեց բնակիչների հետ:
Վերջիններս ներկայացրեցին ստեղծված իրավիճակի հետ կապված իրենց մտահոգությունները, որոնք հիմնականում վերաբերում էին ստանձնած վարկային պարտավորություններին, մատչելի ոռոգման ջրով ու սերմացուով ապահովելու խնդիրներին:
Փոխվարչապետն ու նախարարը տեղեկացրել են, որ նշված բոլոր հարցերը քննարկվում են, և առաջիկա օրերին արդեն կհստակեցվեն աջակցության մեխանիզմները:
Տեղեկացվել է, որ հանձնարարվել է նաև գարնանային սելավային ջրերն ինքնահոս համակարգերի միջոցով հասանելի դարձնել գյուղացիական տնտեսություններին: Այնուհետև Եղվարդի տարածաշրջանի համայնքների և ջրօգտագործողների ընկերությունների (ՋՕԸ) ղեկավարների մասնակցությամբ խորհրդակցություն անցկացվեց Նոր Գեղիի համայնքապետարանում: Համայնքների ղեկավարները ներկայացրեցին իրավիճակը: Քննարկվեցին ցրտահարության հետևանքների մեղմանն ուղղված հետագա անելիքները, կարևորվեցին այգիների խնամքի, նոր մշակաբույսերի ցանքատարածությունների ավելացման աշխատանքները, անդրադարձ եղավ նաև հակակարկտային միջոցառումների իրականացման անհրաժեշտությանը:
Ա. Գևորգյանը տեղեկացրել է, որ առաջնահերթ խնդիրների լուծման հինգերորդ հրատապ ծրագրի շրջանակում մարզում նախատեսվում է հակակարկտային յոթ նոր կայանք տեղադրել:
Պայմանավորվածություն են ձեռք բերվել, որ անհրաժեշտ սերմացուի տեսակների և ծավալների, ինչպես նաև պարարտանյութի լրացուցիչ պահանջարկի մասին հաշվարկները համայնքապետները կներկայացնեն մարզպետարան:
