Երեկ երեկոյան «Իմ քայլը» խմբակցությունը նիստ է անցկացրել։ Լիլիթ Մակունցը հայտնել է, որ քննարկվել է ԱԺ նախագահ Արարատ Միրզոյանի հայտարարությունը՝ Սահմանադրական դատարանի իրավիճակի շուրջ: «Խմբակցությունը որոշեց Սահմանադրական դատարանի դատավոր-անդամներից մեկի նկատմամբ սկսել գործընթաց՝ լիազորությունները դադարեցնելու վերաբերյալ. խոսքը Հրայր Թովմասյանի մասին է»,- ասել է Մակունցը:
Թե ինչ մեխանիզմներով ԱԺ-ն կարող է հասնել Հրայր Թովմասյանի լիազորությունների դադարեցմանը՝ դժվարանում ենք նշել, սակայն կասկածից վեր է, որ կառավարող թիմի նման որոշումը հասունացած էր ու բխում է հեղափոխության օրակարգից։
Բանն այն է, որ Հրայր Թովմասյանի պաշտոնավարումը ՍԴ նախագահի պաշտոնում հակասում է 2015թ. սահմանադրական փոփոխություննների տրամաբանությանը ու տեղավորվում է Սերժ Սարգսյանի իշխանության երկարաձգման արդեն իսկ տապալված ծրագրի համատեքստում։ Այլ խոսքով՝ Թովմասյանի հեռացումը ՍԴ նախագահի պաշտոնից հեղափոխության արժեքների կապիտալիզացիայի կարևոր նախապայման է։
Մյուս կողմից՝ դժվար է ասել, թե ինչու է խորհրդարանական մեծամասնությունը շեշտը դրել անձնավորված թիրախավորումների վրա՝ ՍԴ ճգնաժամին քաղաքական-օրենսդրական համապարփակ լուծում տալու փոխարեն։ Իշխանության վերնախավում թերևս կարծում են, որ Թովմասյանին անվստահություն հարուցելուց հետո ՍԴ մյուս վեց անդամները կգերադասեն ինքնուրույն լքել իրենց պաշտոնները։
Ուշագրավ է նաև երկու հանգամանք։ Արարատ Միրզոյանը ՍԴ ճգնաժամի մասին խոսեց, իսկ «Իմ քայլ»-ը Հրայր Թովմասյանի մասին որոշում կայացրեց ԱԱԾ տնօրեն Արթուր Վանեցյանի հրաժարականի օրը։ Այս իրադարձությունների միջև ուղղակի կապ գուցեև չկա, սակայն դրանք, մեծ հաշվով, ենթակա են ընդհանուր համատեքստին, տրամաբանությանը։ Այլ խոսքով՝ Նիկոլ Փաշինյանի թիմը տվել է հեղափոխության, ըստ էության, նոր փուլի մեկնարկը՝ նպատակ ունենալով պետական համակարգն ամբողջովին ազատել հին համակարգի ուղղակի ու ստվերային ազդեցությունից։ Այս համատեքստում կանխատեսելի է ոչ միայն Հրայր Թովմասյանի լիազորություննների դադարեցումը, այլ նաև մի շարք աղմկահարույց պաշտոնանկություններ ուժային, իրավապահ բլոկներում։
Մյուս կողմից՝ կառավարող խմբակցությունը Հրայր Թովմասյանի վերաբերյալ որոշում է կայացնում Ռոբերտ Քոչարյանի խափանման միջոցի վերաբերյալ դատական որոշման հրապարակման նախորդ օրը, ինչը կարևոր ազդակ է դատական համակարգին ու հասարակությանը։ Քաղաքական մեծամասնությունն արձանագրում է, որ բնավ էլ լեգիտիմ չի համարում Քոչարյանի գործով ՍԴ որոշումը ու իր քայլով ակնարկում է, որ այն չի կարող հանգեցնել երկրորդ նախագահի խափանման միջոցի փոփոխությանը։
Ակնհայտ է, որ Հայաստանը թևակոխում է դրամատիկ զարգացումների նոր փուլ։