Հայաստանի ԱԳՆ խոսնակ Աննա Նաղդալյանը հայտարարել է, որ Հայաստանի ու Ադրբեջանի արտաքին գործերի նախարարներն ընդունել են ԵԱՀԿ Մինսկի խմբի համանախագահների հանդիպման առաջարկը, բայց ժամկետները դեռ չեն հրապարակվում։ Ակնհայտ է, որ Բաքվում հանդիպումից առաջ նյարդայնության նշաններ են, և այդ մասին են վկայում այս օրերի տարատեսակ հարցազրույցներն ու վերլուծությունները։
Բաքվում ԱՄՆ նախկին դեսպան Մեթյու Բրայզան, որը ժամանակին նաև Մինսկի խմբի ԱՄՆ համանախագահ էր, հայկական լրատվամիջոցներից մեկի հետ զրույցում ասել է, որ երբ Լևոն Տեր-Պետրոսյանը մոտ էր ճեղքմանը Ղարաբաղյան կարգավորման գործում, տեղի ունեցավ Հոկտեմբերի 27-ը: Ճեղքում կարող էր լինել նաև Սերժ Սարգսյանի նախագահության տարիներին: Ապրիլյան պատերազմից հետո Պուտինը հետաքրքիր տարբերակ էր առաջարկել, բայց տեղի ունեցավ ՊՊԾ գնդի գրավումը՝ ասում է Բրայզան:
Նա նաև նշում է, որ նույնն էլ հիմա է տեղի ունենում: «Ես գիտեմ, որ Բաքվում ամենաբարձր մակարդակով վստահություն կա Փաշինյանի մտադրությունների նկատմամբ, բայց մտավախություններ կան, որ Փաշինյանը չի կարողանա կոնսոլիդացնել հանրությանը, քանի որ նախկին համակարգն իր դեմ է աշխատում: Կարծում եմ՝ հենց այդ ճնշումն է դանդաղեցնում բանակցությունների գործընթացը»,- ասել է Բրայզան։
Արցախի նախագահ Բակո Սահակյանի աշխատակազմի ղեկավարի տեղակալ Դավիթ Բաբայանն «Առաջին լրատվական»-ի հետ զրույցում ասաց. «Ես չգիտեմ, թե ինչի մասին է խոսում պարոն Բրայզան, բայց ճեղքման համար առաջին հերթին անհրաժեշտ է, որ Ադրբեջանը վերանայի իր քաղաքականությունը, իսկ մենք այդպիսի բան չենք տեսել։ Կա նույն կարծր դիրքորոշումը, նույն ռևանշիստական, մաքսիմալիստական մոտեցումներն են։ Այդ իրավիճակում որևէ ճեղքում անհնար է։ Եթե այս իրավիճակում խոսվում է ինչ-որ հնարավորությունների մասին, ապա դա կա՛մ չի համապատասխանում իրականությանը, կա՛մ ինչ-որ տեղ շահարկվում է»։
Ըստ Բաբայանի՝ Ադրբեջանը երբեք չի հրաժարվել իր հայատյաց, ռևանշիստական մոտեցումներից. «Իսկ սա չի կարող լինել հակամարտության կարգավորման նորմալ ու ընդունելի հիմք։ Այսինքն՝ ի՞նչ է նշանակում, մենք պետք է հանձնվե՞նք Ադրբեջանին, այդպիսի բան հնարավոր չէ և չի լինելու։ Եթե այդ երկիրը չի վերանայում իր մոտեցումը, դա ցույց է տալիս, որ որևէ ճեղքում հնարավոր չէ առհասարակ»։
Քաղաքագետ Ռուբեն Մեհրաբյանի կարծիքով՝ Բրայզայի դիտարկումները մոլորություն են: «Մեծ հաշվով այդ ճեղքումները հնարավոր էին և կարող էին հնարավոր լինել, եթե Ադրբեջանն իր առավելապաշտական դիրքերից հետ կանգներ։ Քանի դեռ դա տեղի չի ունենում, սև կատուներ ման գալ մութ սենյակներում՝ մանավանդ, երբ այդ սև կատուն բացակայում է, իմաստ չունի։ Կարծում եմ՝ պարոն Բրայզայի կողմից այդ մոլորության տիրաժավորումը մեզ պարզապես հեռացնում է իրականությունից»,- «Առաջին լրատվական»-ի հետ զրույցում ասաց նա։
Արդյոք Հայաստանի և Ադրբեջանի ԱԳ նախարարների հանդիպումից առաջ այս հայտարարությունները պատահակա՞ն են՝ հարցին ի պատասխան քաղաքագետն ասաց. «Բրայզան գուցե ինչ-որ շահերի խումբ է ներկայացնում, բայց ոչ պաշտոնական Վաշինգտոնի կարծիքը։ Այնուամենայնիվ, դա նաև ունի այդ համատեքստը։ Ես չեմ կարծում, թե դա որևէ ձևով հնարավորություն ունի կյանքի կոչվելու։ Նորից եմ նշում ՝ Ղարաբաղյան հարցի լուծման բանալին այլ տեղում է։ Քանի Բաքուն իր առավելապաշտական դիրքերից հետ չի կանգնել, դա հնարավոր չէ։ Ղարաբաղի հարցի լուծում հնարավոր չէ հայկական կողմի միակողմանի զիջումների ճանապարհով։ Այսինքն՝ «հող՝ օդի դիմաց» բանաձև գոյություն չունի և չի էլ կարող ունենալ»։
Հետաքրքրվեցինք նաև՝ արդյոք Նիկոլ Փաշինյանին Ղարաբաղյան հակամարտության կարգավորման ճանապարհին խանգարո՞ւմ է նախկին համակարգի դիմադրությունը. «Բացարձակապես։ Փաշինյանին Ղարաբաղյան հարցի լուծման համար որևէ բան չի խանգարում։ Խանգարող հանգամանքը միակն է, որի մասին ես խոսեցի, այն է՝ Իլհամ Ալիևի առավելապաշտական դիրքորոշումը, որը սնուցվում է Ռուսաստանի կողմից։ Թող պարոն Բրայզան ուրիշ տեղ ուրիշ բաներ չորոնի, որովհետև չի գտնելու, ու դուրս գա այդ մոլորությունից»։
