Իտալիայի հարավային Մոլիզե վարչական շրջանի իշխանությունները նպաստ են առաջարկել նրանց, ովքեր ցանկանում են տեղափոխվել տարածաշրջանի բնակավայրերից մեկը, որն ունի մինչև երկու հազար բնակչություն: Այդ մասին հայտնում է The Guardian-ը:
Նպաստի գումարը կկազմի ամսական 700 եվրո, այն կվճարվի նորեկներին երեք տարվա ընթացքում: Այսպիսով, տեղափոխվելու համար փոխհատուցման ընդհանուր գումարը կկազմի 25,2 հազար եվրո: Որպես կանոնավոր կանխիկ վճարումներ ստանալու պարտադիր պայման իշխանությունները նշում են մշտական բնակություն գյուղում կամ փոքր քաղաքում և սեփական բիզնեսի բացում այդ բնակավայրում:
«Դա կարող է լինել հացաբուլկեղենի, գրենական պիտույքների խանութ կամ ռեստորան: Այդ կերպ մենք կյանք կներարկենք մեր քաղաքներում և կավելացնենք բնակչության թիվը»,- ասել է Մոլիզեի ղեկավար Դոնաթա Թոմը։
