Ի պատասխան ԵԽԽՎ-ում ռուսական պատվիրակությանը ձայնից զրկելու ԵԽԽՎ մտադրությանն ու ռուսական պատվիրակությանը լիազորություններից զրկելու մասին խոսակցություններին՝ ՌԴ Պետդուման ևս գործի է անցել և քննարկում է ԵԽԽՎ-ից դուրս գալու նպատակահարմարությունը: Հայաստանյան փորձագետներն արդեն մտավախություններ են հայտնում, թե Ռուսաստանն իր ետևից կտանի նաև Հայաստանին:
«Առաջին լրատվական»-ի հետ զրույցում «Ռուսաստանը գլոբալ քաղաքականությունում» ամսագրի գլխավոր խմբագիր Ֆյոդոր Լուկյանովն ասաց, որ Ռուսաստանն այդքան էլ չի ձգտում դուրս գալ ԵԽԽՎ-ից և դուրս չի գա, նրա համոզմամբ, քանի որ ներկայումս դա այդքան էլ անհրաժեշտ չէ: Ըստ նրա՝ մեկ այլ գործընթաց է առկա՝ հիմա ՌԴ-ն սկսում է հոգեբանորեն պատրաստվել, պարզապես վճռականություն ցուցադրել:
«Եվրոպայի խորհուրդը ևս շահագրգռված է, որ Ռուսաստանը մնա անդամ, որովհետև Ռուսաստանից է գնում ԵԽ բյուջեի զգալի մասը, և ես կարծում եմ, որ ՌԴ-ի կողմից նման նախաձեռնությունները հաստատումն ու զգուշացումն են այն բանի, որ եթե հակամարտությունը խորանա, ապա ՌԴ-ն կարող է հեռանալ՝ համապատասխանաբար իր հետ վերցնելով այն գումարները, որոնք ներդնում է: Սա է ներկայիս իրավիճակը, երբ կան գումարային խնդիրներ Եվրոպայում, սա կարող է էական լինել»,- նշեց նա:
Լուկյանովը նաև ասաց, եթե դա տեղի ունենա, ինչը նա չի բացառում, քանի որ Եվրոպայի խորհուրդը գուցե փորձի ճնշումներ բանեցնել Ռուսաստանի նկատմամբ Ղրիմի և Ուկրաինայի վերաբերյալ, ապա քիչ հավանական է, որ ՌԴ-ն իր գործընկերներից որևէ մեկին փորձի պարտադրել հետևելու իր օրինակին: «Շատ տարօրինակ ենթադրություններ են, թե ՌԴ-ն կտանի իր գործընկերներին իր ետևից»,- նկատեց նա:
Գնահատելով ՄԱԿ ԳԱ-ում ՀՀ-ի քվեարկությունն ուկրաինական բանաձևի դեմ՝ նա նշեց, որ ՌԴ-ի ու ՀՀ-ի հարաբերությունները հիմա բավական հաստատուն են՝ Հայաստանը հստակեցրել է իր դիրքորոշումը Ռուսաստանի նկատմամբ և դրսևորում է իրեն բավական հետևողականորեն: Իսկ Ռուսաստանը, նրա համոզմամբ, գնահատում է դա: