Վրաստանի նոր վարչապետ Գեորգի Գախարիան «Իմեդի» և «Ռուսթավի 2» հեռուստաընկերություններին խնդրել է պետությանը վճարել բոլոր պարտքերը: Այդ մասին հայտնում է Georgia Online-ը:
Նրա խոսքերով, պետության առաջ հավասար են բոլորը և կանոնները նույնն են բոլոր լրատվամիջոցների համար՝ անկախ դրանց տերերից և կողմնորոշումից: Նա նշել է, որ հաճախ պետության կողմից հարկեր վճարելու պահանջն անվանում են հարձակում լրատվամիջոցների վրա, բայց դա այդպես չէ:
«Դրան պետք է վերջ դրվի»,- շեշտել է Գախարիան:
Վարչապետը հավելել է, որ առաջատար լրատվամիջոցները չեն կարող օբյեկտիվ լինել, եթե նրանք պետությունից և այլ կոմերցիոն կառույցներից գումար են վերցնում, իսկ հետո չեն վերադարձնում:
«Նրանք արդեն ունեն իրենց սուբյեկտիվ հետաքրքրությունը՝ ուղղված տարբեր քաղաքական և, ակնհայտորեն, արդեն առևտրային և ֆինանսական հետաքրքրությունների բավարարմանը»,- եզրափակել է Գախարիան:
