Սեռական խնդիրների մի մասը պայմանավորված է անտեղյակությամբ: «Առաջին լրատվական»- ի «Սեռական հոլով» հաղորդաշարն օգնում է լինել իրազեկ և լուծել սեռական խնդիրները: Այսօրվա մեր հյուրի խնդիրը նույնպես ինչ-որ չափով կապված է ոչ ճիշտ իրազեկվածության հետ: Նա, փորձելով հաղթահարել կաշկանդվածությունը, դիմել է բժիշկ, սեքսապաթոլոգ Վրեժ Շահրամանյանին. «21 տարեկան եմ, սեռական փորձ չունեմ: Սեռական կյանքով ապրելուց խուսափել եմ, քանի որ նախ՝ այնպիսի միջավայրում եմ մեծացել, որ սեռական կյանքը մի ուրիշ անկյուն է համարվել, բացի դրանից՝ ինտերնետային հոդվածներ ընթերցելով՝ իմ մեջ վախ էր առաջացել, որ սեռական վարակներ կփոխանցվեն ինձ: Մի օր ընկերներով որոշեցինք գնալ մարմնավաճառի մոտ… Երբ հերթն ինձ հասավ, ես շատ լարված ու կաշկանդված էի, ամաչում էի, մտածում, որ ոչինչ չի ստացվի, և իսկապես չստացվեց…»:
Բժիշկ-սեքսապաթոլոգի հավաստմամբ՝ առաջին սեռական հարաբերությունը հիմնականում տեղի է ունենում մարմնավաճառի հետ, ընկերները կամ անգամ ծնողները՝ հատկապես հայրիկը «խորհուրդ են տալիս» սեռական փորձ ձեռք բերել՝ այցելելով մարմնավաճառի: «Առաջին փորձը, որ տեղի է ունենում մարմնավաճառի հետ, կարելի է համարել սթրեսային քննություն: Առաջին սեռական փորձը, հատկապես տղամարդու համար շատ պատասխանատու պրոցես է: Կարդալով տարբեր հոդվածներ սեռավարակների մասին՝ արդեն իսկ վախով լեցուն նախատրամադրվածություն է առաջանում:
Մարմնավաճառի հետ առաջին սեռական փորձ ձեռք բերելը ոչ ճիշտ տարբերակ է, քանի որ մարմնավաճառի հետ շփումը ենթադրում է վճարովի ծառայություն, որի ընթացքում պետք է փորձեք վայելել հաճույք. տղամարդը գիտի, որ ունի սահմանափակ ֆիքսված ժամանակ, որի ընթացքում ինքը պետք է կատարի գործողություն: Ներքին տագնապին ավելանում է այս իրավիճակային լարվածությունը, և փորձը ձախողվում է:
Սեռական կյանքը չի սիրում լարվածություն, առաջին փորձը պետք է կատարվի հանդարտ, հանգիստ, հաճելի իրավիճակում: Ցանկալի է ունենանալ մշտական զուգընկերուհի. մշտական զուգընկերուհու առկայության պարագայում ժամանակի ընթացքում ձեռք կբերեք հանգստություն, ժամանակի ընթացքում ճանաչելով նրան՝ չեք ունենա լարվածություն և անկողնային շփման ժամանակ շատ վստահ կզգաք ձեզ:
Պետք է զուգընկերուհու հետ հարաբերություններն այնքան խորացնել և շփումները զարգացնել, որ խոր կապվածություն առաջանա նրա հետ. այս հանգամանքը կբերի նրան, որ կունենաք ինքնաբուխ մղում՝ փորձարկելու ձեր սեռական ցանկությունը և անկողնում ձեզ ավելի ազատ կզգաք:
Անկողինը չի սիրում կաշկանդվածություն»,- նշեց Վ. Շահրամանյանը:
Մանրամասն տեսանյութում: