Սեպտեմբերի 5-ին ՀՀ ԱԺ արտաքին հարաբերությունների մշտական հանձնաժողովում խորհրդարանականները ՀՀ ԱԳ նախարար Զոհրաբ Մնացականյանի հետ համատեղ քննարկել են ՀՀ արտաքին հարաբերությունների վերաբերյալ մի շարք հարցեր: ՀՀ ԱԺ արտաքին հարաբերությունների մշտական հանձնաժողովի անդամ, «Լուսավոր Հայաստան» խմբակցության պատգամավոր Արման Բաբաջանյանը, ի թիվս մի շարք հարցերի, ԱԳ նախարարից հետաքրքրվեց, թե ինչ նոր ծրագրեր են նախատեսվում ՆԱՏՕ-ի հետ համագործակցության ուղղությամբ. «Դեսպանահավաքի ժամանակ Ձեր ելույթում ոչ մի բառ չհնչեց ՆԱՏՕ-ի վերաբերյալ, արդյոք ՆԱՏՕ-ի հետ համագործակցության զարգացմանը միտված նոր ծրագրեր կա՞ն, թե՞ ոչ»:
Նախարար Զ. Մնացականյանը պատասխանեց, որ ՆԱՏՕ-ի հետ հարաբերությունները շատ էական նշանակություն ունեն մեր արտաքին քաղաքականութան համար, և կառավարության ծրագրում դա արտահայտված է. «Գործնական առումով ծավալուն աշխատանք է իրականացվում: Մենք ունենք ակտիվ ներկայություն ՆԱՏՕ-ում, բարձր եմ գնահատում մեր ներկայացուցիչների աշխատանքը, մենք ունենք նաև պառլամենտական հարթակը ՆԱՏՕ-ի հետ համագործակցության, այստեղ ունենք ՆԱՏՕ-ի կենտրոն, մշակված է անհատական գործողությունների ծրագիրը: Սա ձևավորված ուղղություն է մեր արտաքին քաղաքականության մեջ, մենք ՆԱՏՕ-ի միջոցով օգտագործում ենք մեր կարողությունների զարգացումը, այդ համագործակցությունը ծառայում է շատ կոնկրետ նպատակների, մենք ներդրող ենք միջազգային անվտանգության օրակարգում՝ նաև օգտագործելով ՆԱՏՕ-ի հետ համագործակցության հարթակը, այդ հարթակն օգտագործվում է նաև ռազմաքաղաքական բնագավառում համագործակցություն իրականացնելու համար՝ երկկողմ ուղղություններով գործընկերների հետ: Այս ամենը եղել և մնում է մեր օրակարգում, որևէ բան չի փոխվել, կանոնավոր աշխատանքը շարունակվում է, և այդ ամենը համատեղվում է բոլոր մյուս ուղղություններով համագործակցության հետ»:
Մանրամասն՝ տեսանյութում:
