Ռիչարդ Սթենգելը, որը նախկինում հանրային դիվանագիտության և հասարակայնության հետ կապերի գծով պետքարտուղարի տեղակալ էր, գիրք է թողարկել տեղեկատվական պատերազմների մասին, որոնցում պարտվում է ԱՄՆ-ը, գրում է The Washington Post-ը:
Ըստ հրապարակման, գրքում նա բացատրում է, որ կառավարության բյուրոկրատիան, իներցիան և բաց ժողովրդավարական հասարակության սահմանափակումները Միացյալ Նահանգներին խոցելի են դարձրել համացանցի միջոցով իրականացվող գաղտնի գործողությունների հանդեպ: Սթենգելի կարծիքով, կառավարությունը նաև չափազանց դանդաղկոտ է և ծավալուն: Գրքում խոսվում է նաև «ռուսաստանի միջամտության» մասին, ինչը Մոսկվան հերքում է: Ըստ հեղինակի, ԱՄՆ նախկին նախագահ Բարաք Օբամայի վարչակազմը չի շտապել դրան պատասխանել և չէր էլ կարող համապատասխան հակահարված տալ: Միևնույն ժամանակ, նա թերահավատորեն է վերաբերվում այն փաստին, որ նման «միջամտությունը» վճռորոշ էր ԱՄՆ նախագահ Դոնալդ Թրամփի հաղթանակի համար: Հեղինակը նշում է, որ CNN-ը շատ ավելին է արել այս արդյունքի համար:
Սթենգելը կարծում է, որ Facebook-ի նման ընկերություններին պետք է վերաբերվել հրատարակիչների նման՝ պահպանելով դրանց անձեռնմխելիությունը և միջամտել միայն կեղծ կամ չարամիտ կոնտենտը հեռացնելու համար: Բացի այդ, անհրաժեշտ է հստակություն այն ալգորիթմների վերաբերյալ, որոնք որոնող համակարգերն օգտագործում են կոնտենտը պատկերելու համար: Նա չի կարծում, որ կառավարությունը պետք է միջամտի, և հանդես է գալիս համակարգի ինքնակարգավորման օգտին: