Երևանի ջրամատակարարման և ջրահեռացման ծրագրին առնչվող հարցեր են քննարկվել Երևանի քաղաքապետ Կարեն Կարապետյանի և Հայաստանում Համաշխարհային բանկի գրասենյակի ղեկավար Ժան Միշել Հափփի հանդիպման ժամանակ։ Կողմերը մտքեր են փոխանակել՝ կապված Համաշխարհային բանկի կողմից իրականացվող ջրամատակարարման և ջրահեռացման ծրագրի ընթացքի և շարունակականության անհրաժեշտության հետ։
Շեշտելով, որ ոլորտի բարեփոխումները և ջրամատակարարման որակի բարելավումը քաղաքապետարանի ծրագրային առավել կարևոր առաջնահերթություններից է, քաղաքապետն ընդգծել է որ մայրաքաղաքում, ցավոք, ջրամատակարարման որակը չի բավարարում բնակչության պահանջները և ետ է մնում հանրային ծառայություն մատուցող մյուս ընկերություններից։ Կարեն Կարապետյանը նշել է նաև, որ քաղաքապետարանը պատրաստակամ է աջակցել ոլորտի կանոնակարգման գործընթացին՝ ինչպես կառավարման, այնպես էլ ֆինանսավորման նոր աղբյուրներ ներգրավելու հարցում՝ միաժամանակ ակնկալելով Համաշխարհային բանկի և այլ դոնորների աջակցությունը։
Խոսելով բանկի կողմից Հայաստանում ներկայում իրականացվող ծրագրերի շուրջ և գնահատելով բարեփոխումների ընթացքը՝ Հայաստանում ՀԲ գրասենյակի ղեկավարը նշել է, որ ջրամատակարարման ոլորտում աշխատանքները կազմակերպելու և հետագա քայլերը հստակեցնելու համար անհրաժեշտ է ունենալ համակարգում տիրող իրավիճակի ռեալ գնահատական։ Վերջինս հաստատել է Երևանի ջրամատակարարման և ջրահեռացման ոլորտին աջակցելու Համաշխարհային բանկի պատրաստակամությունը՝ առաջիկայում հարցը քննարկելով ՀՀ կառավարության հետ։
