Գեղարքունիքի մարզի ընդհանուր իրավասության դատարանում Յուրիկ Իսկոյանի նախագահությամբ սկսվում է Դեկարտ Մովսիսյանի և Գեղամ Գաբրիելյանի գործի դատական քննությունը:
Դեկարտ Մովսիսյանը դասակի հրամանատար է եղել, կոչումով՝ ավագ լեյտենանտ:
Առաջադրված մեղադրանքի համաձայն՝ 2013 թվականի սեպտեմբերի 26-ին, նախապես տեղեկանալով, որ ժամկետային զինծառայող, շարքային Արտավազդ Ղ.-ն ցանկանում է զորամասն ինքնակամ լքել և մեկնել Արտաշատ, իր համար ավտոմեքենայի մաս գնելու շահագրգռվածությունից ելնելով՝ չարաշահել է իր պաշտոնեական դիրքը. նա անձամբ զանգահարել ու զորամաս է կանչել տաքսու վարորդ Պ. Դարբինյանին, ով նույն օրը գնացել է զորամաս ու զինվոր Արտավազդին տեղափոխել է Վարդենիս: Զինվորն այնտեղից մեկ այլ մեքենայով մեկնել է Արտաշատ:
Փաստորեն, դասակի հրամանատարը ոչ թե կանխել է զինվորի անօրինական բացակայությունը, այլ «կազմակերպել է» այն, որի հետևանքով զինվորը տևական ժամանակ չի կատարել իր վրա դրված ծառայողական պարտավորությունները, էական վնաս է հասցվել ծառայության կրման սահմանված կարգին:
Բացի դրանից, փիլիսոփայական անուն կրող ավագ լեյտենանտ Մովսիսյանը 2013 թվականի հոկտեմբերի 10-ին, ժամը 12-ի սահմաններում գումարտակի ճաշարանի պետի աշխատասենյակում, վերջինիս ներկայությամբ նույն զինվոր Արտավազդից խնդրել է 500 հազար դրամ:
Զինվորը պատրաստակամություն է հայտնել գումարը հայթայթել:
Հաջորդ օրը՝ հոկտեմբերի 11-ին, առավոտյան ժամը 4-ի սահմաններում, նախապես տեղյակ լինելով, որ զինվորն ընդգրկված է պարեկային ծառայությունում՝ որպես պարեկ, Դեկարտ Մովսիսյանը, հանդիսանալով պետ ու պաշտոնատար անձ, չարաշահել է իր պաշտոնեական դիրքը, անձնական՝ գումարային շահագրգռվածությունից ելնելով՝ զինվորի հետ ապօրինի կերպով, ինքնակամ լքել է զորամասի տարածքը:
Նրանք միասին մեկնել են Արտաշատ՝ գումար հայթայթելու:
Ըստ մեղադրանքի՝ Դեկարտ Մովսիսյանը երեք ամսվա ընթացքում նաև հինգ անգամ առանց հարգելի պատճառների ժամանակին չի ներկայացել ծառայության վայր:
Դեկարտ Մովսիսյանին մեղադրանք է առաջադրվել ՀՀ քրեական օրենսգրքի 375 հոդվածի 1-ին մասով՝ երկու դրվագով, և 361 հոդվածի 4-րդ մասով:
Նախկինում էլ դատվածություն ունեցող Դեկարտ Մովսիսյանի խափանման միջոցը կալանավորումն է:
Այս գործով երկրորդ ամբաստանյալը՝ Գեղամ Գաբրիելյանը, նույնպես դասակի հրամանատար է, ավագ լեյտենանտ:
Ըստ մեղադրանքի՝ Գեղամ Գաբրիելյանը ևս շահադիտական դրդումներով չարաշահել է իր պաշտոնեական դիրքը, համաձայնության է եկել արդեն հիշատակված շարքային Արտավազդի հետ, որ կարճատև արձակուրդ մեկնելու դիմաց զինվորը 80 հազար դրամ կտա:
Այս զինվորին երկու ավագ լեյտենանտները դարձրել էին իրենց համար «փողային խնդիրներ լուծող» թույլ օղակ՝ դրա դիմաց նրան ապօրինի կերպով ինչ-ինչ ազատություններ «ընծայելով»:
2013 թվականի սեպտեմբերի 19-ին Գեղամ Գաբրիելյանը շարքային Արտավազդի դասակի հրամանատար Գ. Բաղդասարյանի փոխարեն ստորագրել է արձակուրդ տրամադրելու միջնորդությամբ զեկուցագիրը, որի հիման վրա զինվորը սեպտեմբերի 19-ից մինչև 24-ը մեկնել է 6-օրյա արձակուրդ:
Սեպտեմբերի 26-ին Գեղամ Գաբրիելյանն իմացել է, որ շարքային Արտավազդն արձակուրդից վերադարձել է, բայց պայմանավորված գումարը չի բերել:
Ավագ լեյտենանտ Գաբրիելյանը հանդիպել է զինվորին ու պահանջել, որ նա կարճ ժամանակում իրեն տա խոստացած գումարը:
Շարքային Արտավազդը ստիպված է եղել նույն օրն ինքնակամ լքել զորամասի տարածքը, մեկնել Արտաշատ: Այնտեղ նա իր քեռուց վերցրել է 80 հազար դրամ, հաջորդ օրը՝ սեպտեմբերի 27-ին վերադարձել է զորամաս ու պահանջված գումարը տվել է Գեղամ Գաբրիելյանին:
Բացի դրանից, Գեղամ Գաբրիելյանը երեք ամսվա ընթացքում չորս անգամ առանց հարգելի պատճառների ժամանակին չի ներկայացել ծառայության վայր:
Գեղամ Գաբրիելյանին մեղադրանք է առաջադրվել ՀՀ քրեական օրենսգրքի 375 հոդվածի 1-ին մասով և 361 հոդվածի 4-րդ մասով:
Գաբրիելյանի խափանման միջոցը ստորագրությունն է չհեռանալու մասին: