Լուրեր
Հայաստանը մտել է լճացող բանավեճերի փուլ․ Արշակ Բանուչյան

Ակնկալվում էր, որ թավշյա հեղափոխությունից հետո շատ արագ տեղի է ունենալու մշակութային հեղափոխություն, արժեքների հեղափոխություն: Ի՞նչն է խանգարում, որպեսզի արագացնենք այդ գործընթացը՝ հաշվի առնելով, որ մշակույթն է այն շարժիչ ուժը, որ ամեն ինչի, թե՛ արտաքին քաղաքականության, թե՛ ներքին զարգացումների հենքում է: «Առաջին լրատվական»-ի հետ զրույցում անդրադառնալով այս հարցին՝ Երուսաղեմի Հայոց պատրիարքության Մայր դիվանի տնօրեն Արշակ Բանուչյանն ընդգծեց. «Մշակույթի մեջ հեղափոխություն լինում է այն ժամանակ, երբ հանճարեղ արվեստագետ է հայտնվում: Այսինքն՝ մշակույթի մեջ հեղափոխություն անողը մշակութային գործիչն է, և ոչ թե քաղաքական գործընթացների հետևանքով է մշակութային հեղափոխություն տեղի ունենում:

Կարծում եմ՝ Խորհրդային Միության կառավարման միակուսակցական համակարգից դուրս գալով՝ մշակույթի, կրթության և մյուս բոլոր ոլորտներն անտեր մնացին, որովհետև սովոր էին, որ իրենց պետք է ինչ-որ բան ասվեր… Արտաքին աշխարհին ներկայանում ենք մեր մշակույթով, բայց դա չպետք է լիներ այնպես, որ մշակույթի նախարարությունը դառնար պրոտոկոլի բաժին: Նախաձեռնողականություն է պետք, բայց դրանից առաջ պետք է երազանք ունենալ… Այսօր պետք է մեր երազած պետության սերմերը դնել:

Իմ տպավորությամբ՝ մենք ուշանում ենք արդեն, մենք մտել ենք տևական, ոչինչ չստեղծող բանավեճի մեջ: Բոլորս մեկ նավակի մեջ ենք, և ամեն մեկիս շարժումը ճոճում է նավակը… Մենք պետք է այնպիսի գործողություններ անենք, որոնք հարյուրավոր տարիներ հետո պտուղ պետք է տան: Իսկ ինչու ենք դանդաղում. որովհետև դիսկուրսը դարձել է անիմաստ վեճ: Ստեղծագործ աշխատանքը միավորող է, պետք է, որ երազանքի շուրջ միավորվեինք:

Մշակութային քաղաքականությունը երեք հիմնական ոլորտ ունի՝ մշակութային ժառնագության պահպանություն, մշակութային կրթություն և մշակութային ստեղծագործ պրոցեսներ: Հին ժառանգությունը չպետք է քանդել, քանի որ վատի հետ լավն էլ կոչնչանա, բայց պետք է նոր, փորձարարական մեխանիզմներ ստեղծել. նոր գինին հին տիկերում չեն պահում»:

Մեր զրուցակիցը նաև ընդգծեց, որ եթե լուրջ փոփոխություններ չիրականացվեն կրթության համակարգում, չի փոխվելու մեր հայացքը կյանքի նկատմամբ: «Մեր համակեցության կանոնները դեռևս չեն փոխվել,-նշեց Արշակ Բանուչյանը,- չարացած ենք միմյանց նկատմամբ՝ փոխանակ միասին մի ճշմարտության հասնելու և դրա համար ուրախանալու»:

Մանրամասն՝ տեսանյութում:

  • Դիտումներ՝ *