Կառավարությունը որոշում է կայացրել Արարատի մարզում հողատարածք տրամադրել «Երեխաների քաղաքի» կառուցման համար: Նախագծի համաձայն՝ քաղաքում ապահով օթևան կգտնեն հաշմանդամություն ունեցող և սոցիալապես անապահով երեխաներ և երիտասարդներ՝ իրենց ընտանիքների հետ՝ Հայաստանի տարբեր մարզերից և մայրաքաղաքից: Շահառուների թիվը կարող հասնել մոտ 8000-ի:
Արդյո՞ք նպատակահարմար է այս նախագծի իրագործումը: Թեմայի շուրջ «Առաջին լրատվական»- ի հետ զրույցում «Այբ» դպրոցի տնօրեն Արամ Փախչանյանը հավաստիացրեց, որ հայտնի են և՛ տապալված, և՛ լավ օրինակներ: «Օրինակ՝ Նյու Յորքում նման փորձ է արվել և շատ վատ է ավարտվել. շքեղ շենքերում բնակեցված սոցիալապես անապահով ընտանիքները ժամանակի ընթացքում ստեղծել են մի միջավայր, որտեղ հանցագործությունների քանակն է ավելացել, երեխաների բարեկեցության խնդիրներ են առաջացել: Բայց կան մի քիչ ավելի լավ օրինակներ, օրինակ՝ Սթիվ Ջոբսը ապրել է նման մի ավանում, որը ստեղծվել էր ճարտարապետների կողմից բանվորական խավի համար: Գեղեցիկ կառույցներում բնակվելն իր ազդեցությունն է ունեցել Ջոբսի ճաշակի, դիզայնի ոլորտում հաջողության և ամբողջ կյանքի վրա: Այս հարցի շուրջ երկակի տեսակետներ կարող են լինել, բայց ռիսկերը մեծ են»:
Արամ Փախչանյանի կարծիքով՝ սոցիալապես անապահով մարդկանց խնդիրները պետք է լուծել նրանց հնարավորություններ ընձեռելով, ոչ թե ընթացիկ խնդիրները լուծելով, ինչը նրանց նետում է դեպի պասիվություն: «Նման մարդիկ համախմբվելով և չտեսնելով այլ ճանապարհներ, ընդօրինակում են միմյանց, արդարացնում են դա, ինչը նաև հաջորդ սերունդների վրա է ազդում»:
Անդրադառնալով կրթության ոլորոտին՝ դպրոցի տնօրենը նշեց, որ կրթության համակարգում ամենակարևորը ներառականությունն է. «Կրթության միակ միջոցը բոլորի ներգրավումն է, ընտանիքի ներգրավումն է»: Մեր զրուցակիցը նաև ընդգծեց, որ կրթության ոլորտում նախատեսվում են փոփոխություններ, որոնք ոգևորիչ են, խնդիրն այն է՝ կիրականանան դրանք, թե ոչ: Նրա խոսքով՝ կրթական համակարգի շուրջ ազգի համար կարևոր գործընթացները տեղի են ունենում փակ դռների ետևում:
Մանրամասն՝ տեսանյութում: