Յուրաքանչյուր տարի աշխարհի բնակչությունն ավելանում է մոտ 78 միլիոն մարդով, իսկ 2011 թ. կհասնի 7 միլիարդի:
Այլ հարց է՝ կկարողանա՞ն նրանք միասին ապրել առողջ մոլորակում։ Դա կախված է արդեն այսօր ընդունվող որոշումներից և կատարավող քայլերից: Բնակչության համաշխարհային օրը ՄԱԿ-ի բնակչության հիմնադրամի հայաստանյան գրասենյակը մեկնարկում է «Աշխարհը՝ 7 միլիարդ և 7 միլիարդ գործողություն» արշավը, որն ուղղված է ավելի արդար և կայուն աշխարհի ձևավորմանը: Այս մասին այսօր հրավիրված մամուլի ասուլիսի ընթացքում տեղեկացրեց ՄԱԿ-ի բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանը:
Անկախ փորձագետ, ժողովրդագիր Ռուբեն Եգանյանը ավելացրեց, որ այսօր Հայաստանը կանգնած է ժողովրդագրական մի շարք խնդիրների առաջ, որոնց թվում են ցածր ծնելիությունը, բնակչության ծերացումը, արտագաղթը և մահացության աճը:
Նրա դիտարկմամբ՝ տարիներ առաջ մեր տարածաշրջանում մենք կազմում էինք մեր սահմանակից երկրների բնակչության 3 տոկոսը, այսօր 2 տոկոսն ենք կազմում, իսկ 10 տարի հետո կկազմենք 1 տոկոսը և այսպես շարունակ:
Ինչևէ, այսօր հրավիրված ասուլիսի ընթացքում ՀՀ բնակչության վերարտադրողական վարքագծի ընտրանքային հետազոտության մասին ասուլիսի ընթացքում ցուցադրվեց ֆիլմ, որը վկայում էր, որ Հայաստանի ընտանիքների 57 տոկոսի համար ցանկալի է 3-4 երեխա ունենալը, մինչդեռ երեխաների այժմյան միջին թիվը 2 է: Ընդ որում՝ մոտակա 3 տարիների ընթացքում երեխա ունենալու ցանկություն չունեն հարցվածների ավելի քան երկու երրորդը:
Ի դեպ, հետազոտությունը իրականցվել է 2009 թ. ՄԱԿ-ի բնակչության հիմնադրամի, ՀՀ աշխատանքի և սոցիալական հարցերի նախարարության և ազգային վիճակագրական ծառայության կողմից: Սոցհարցումը նաև ցույց է տալիս, որ ընտանքիներին երեխա ունենալուց հետ են պահում երեխայի՝ լավ ապագա ունենալու դժվարությունը, ամուսիններից մեկի չցանկանալը, բնակարանային վատ պայմանները և մի շարք այլ օբյեկտիվ պատճառներ:
Սակայն ամենամտահոգիչն այն էր, որ հարցվողների 44 տոկոսն առաջին իսկ հնարավորության դեպքում պատրաստ են լքել Հայաստանը և բռնել արտագաղթի ճանապարհը:
Գարիկ Հայրապետյանը նաև ավելացրեց, որ, համաձայն ՄԱԿ-ի ազգաբնակչության բաժնի կանխատեսումների, աշխարհը 8 միլիարդի կհասնի 2025 թ., 9 միլիարդի ՝ 2043 թ., իսկ արդեն 10 միլիարդի՝ 2083 թ.: Հայաստանի բնակչությունը, ըստ կանխատեսումների, 2050 թ. կլինի 2.3-2.5 միլիոն:
Սակայն անկախ փորձագետ, ժողովրդագիր Ռուբեն Եգանյանը նշեց, որ սրանք մոտավոր թվեր են, քանի որ աշխարհի բնակչությունը հնարավոր չէ հաշվել այնպես, ինչպես սեփական գրպանի գումարները: Միաժամանակ ավելացրեց, որ այս տարի մենք կանցկացնեք մարդահամար, որը, քիչ թե շատ, մեր ազգաբնակչության մոտավոր պատկերը կներկայացնի:
Ասուլիսին հրավիրված ՀՀ աշխատանքի և սոցիալական հարցերի նախարարության ժողովրդագրության բաժնի պետ Վանիկ Բաբաջանյանից հետաքրքրվեցին, թե կառավարությունը ի՞նչ է անում ստեղծված իրավիճակի բացասական հետևանքները կանխարգելելու առումով:
Նա նշեց, որ 2011 թ. պետբյուջեում 4 միլիարդ 475 միլիոն դրամ է տրամադրվել 4-րդ և ավելի երեխաներ ունեցողներին խրախուսման նպատակով։
Ծննդօգնությունը և մինչև 7 տարեկան երեխաների բուժումը անվճար է դարձվել։
2011 թ. վերջին տվյալներով՝ 425 երիտասարդ ընտանիքների բնակարանային վարկ է ֆինանսավորվել, որոնցից մոտ 170-ը՝ մարզերում:
Նա միաժամանակ համաձայնեց, որ ոչ բոլոր երիտասարդ ընտանիքներին է հասանելի բնակարան ձեռք բերելը՝ առաջ քաշված պահանջների պատճառով:
Ինչ վերաբերում է պետության իրականացրած միջոցառումներին՝ համաձայնեց, որ դրանք չի կարելի համարել իդեալական, քանի որ լրացնելու շատ բացեր դեռ կան:
Ամեն դեպքում, անկախ փորձագետ, ժողովրդագիր Ռուբեն Եգանյանը մի շատ կարևոր դիտարկում արեց: Նրա խոսքերով, եթե բնակչության 44 տոկոսը պատրաստ է արտագաղթելու, ապա այստեղ ոչ ծննդօգնության, ոչ բնակարանների վարկավորման, ոչ էլ 4-ից ավելի երեխաներին խրախուսման նպատակով տրվող գումարները ստեղծված իրավիճակին լուծում կտան:
