CNN-ը, հղում անելով վարչակազմի բարձրաստիճան ներկայացուցչին, հայտնում է, որ ԱՄՆ նախագահ Դոնալդ Թրամփի վարչակազմը մինչև շաբաթվա վերջ առաջ կտանի արտասահմանյան երկրների ֆինանսական աջակցության չեղարկման մասին ծրագիրը:
Հեռուստաալիքի աղբյուրը նաև հայտնել է, որ այդ քայլն էլ ավելի կուժգնացնի նման հակասական քայլի շուրջ Սպիտակ տան և Կոնգրեսի միջև պայքարը:
Օրենսդիրներն ու նախագահի արտաքին քաղաքականության աջակիցները դեմ են արտահայտվել արտասահմանյան ֆինանսավորման չեղարկմանը՝ իրենց անհամաձայնությունը հայտնելով Պետդեպարտամենտին և ԱՄՆ Միջազգային զարգացման գործակալությանը:
Այդ քայլի հակառակորդները զգուշացնում են, որ արտասահմանյան երկրների ֆինանսական աջակցության չեղարկումը կազդի ԱՄՆ արտաքին քաղաքականության առաջնահերթությունների վրա:
Միևնույն ժամանակ, Կոնգրեսի և՛ Հանրապետական, և՛ Դեմոկրատական կուսակցության, ինչպես նաև ԱՄՆ Պետդեպարտամենտի մի շարք ներկայացուցիչներ լոբբինգ են արել արտասահմանյան երկրների ֆինանսական աջակցության չեղարկման մասին Սպիտակ տան ծրագիրը: Նշվում է, որ տվյալ գումարը, հնարավոր է, կազմում է մինչև 4 մլրդ դոլար: Թրամփի վարչակազմը ձգտում է ազատվել «անօգուտ ծախսից» և ֆինանսավորում է տրամադրում միայն ԱՄՆ քաղաքականության աջակցման պայմանով:
Սպիտակ տան ներկայացուցիչները կարծում են, որ բավարար իրավասություններ ունեն չեղարկումն առանց Կոնգրեսի համաձայնության իրականացնելու համար:
Աղբյուրը նաև հայտնել է, որ փաթեթը ներառում է ՄԱԿ-ին գումարի տրամադրում՝ ներառյալ խաղաղության պահպանման ծրագրերի ֆինանսավորում, ինչպես նաև ֆինանսավորում Հոնդուրասին, Գվատեմալային, Սալվադորին և մշակութային ծրագրերին: Հեռուստաալիքը նշում է, որ ԱՄՆ նախագահի դստեր՝ Իվանկա Թրամփի և փոխնախագահ Մայք Փենսի ծրագրերը, ինչպես նաև գլոբալ առողջապահության ծրագրերը կմնան անձեռնմխելի: