Կոտայքի մարզի ընդհանուր իրավասության դատարանում Գեղամ Մարգարյանի նախագահությամբ ավարտվել է Հակոբ Արշակյանի գործի դատական քննությունը:
1992 թվին ծնված Հակոբ Արշակյանը դեպքի պահին 24 տարեկան էր: Նրան մեղադրանք էր առաջադրվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Ըստ մեղադրանքի՝ 2016 թվականի հոկտեմբերի 29-ին, ժամը 21-ի սահմաններում Հակոբ Արշակյանը ընկերոջ՝ Միքայելի հետ գնացել է Աբովյան քաղաքի «Օլե» ակումբ:
Նրանք զբաղեցրել են ակումբի սրահում գտնվող սեղաններից մեկը, օգտագործել են ոգելից խմիչք ու զվարճացել են մինչև գիշերվա ժամը 1-ն անց 30-ը:
Այդ ընթացքում Հակոբ Արշակյանը, ըստ մեղադրանքի, նկատել է, որ ակումբի սրահում մեկ այլ սեղանի մոտ անծանոթ աղջկա հետ նստած է իր ընկերներից՝ Սարգիսը:
Հակոբը տեղափոխվել է Սարգսի սեղանի մոտ:
Ժամը 1-ն անց 30-ի սահմաններում Հակոբը վճարել է իրենց սկզբնական սեղանի հաշիվը և ցանկացել է դուրս գալ ակումբից: Դուրս գալու ժամանակ նա նկատել է, որ Սարգիսը մտնում է ակումբի տնօրեն Մամիկոն Գ.-ի աշխատասենյակ:
Հակոբը ցանկացել է իմանալ՝ ինչու է Սարգիսը մտել տնօրենի աշխատասենյակ, ինքն էլ է ներս մտել:
Պարզվել է՝ Սարգիսը բավական գումար չուներ սեղանի հաշիվը փակելու համար, նա խնդրել է տնօրենին, որ հաշիվը վճարի մի քանի օր հետո:
Հակոբ Արշակյանը, ըստ մեղադրանքի, անհարկի միջամտել է ընկերոջ ու ակումբի տնօրենի խոսակցությանը և վիրավորական արտահայտություններ է արել տնօրենի հասցեին, մասնավորապես՝ նրան ասել է. «Ի՞նչ կապիկություններ եք անում»:
Վեճ է առաջացել Հակոբի ու ակումբի տնօրենի միջև: Վեճին միջամտել է նաև տնօրենի ընկեր Հրաչյան, ում Սարգիսը անվանել է «փեջնիկ», և վեճը ավելի է բորբոքվել:
Վիճաբանությունը շարունակելու համար չորսով տնօրենի աշխատասենյակից դուրս են եկել, գնացել են ակումբի բակ:
Այնտեղ Սարգիսը բռունցքով հարվածել է տնօրենի ընկեր Հրաչյային ու ասել է. «Հեսա գալու ենք, տես՝ ինչ ենք անելու»:
Ակումբի տնօրենը զայրացել ու պատասխանել է. «Ում հետ ուզում ես՝ արի»:
Ըստ մեղադրանքի՝ Հակոբ Արշակյանը վրդովվել է տնօրենի խոսքերից, նրան ասել է. «Էդ ի՞նչ ասելու բան էր, որ ասում ես»:
Նա տնօրենին առաջարկել է երկուսով առանձնանալ ու պարզաբանել տեղի ունեցածը:
Տնօրենը Հակոբի հետ առանձնացել է բակում:
Հակոբը, ըստ դատական ակտի, դանակով երեք անգամ հարվածել է Մամիկոն Գ.-ի գլխի ու պարանոցի հատվածներին:
Տուժողը ձախ ականջախեցու ծակած-կտրած, ձախ քունքային շրջանով գանգի խոռոչ թափանցող, գլխուղեղի ուղեղիկի վնասումով վնասվածքների ձևով ստացել է կյանքին վտանգ սպառնացող առողջության ծանր վնաս:
Նրան տեղափոխել են Աբովյանի բժշկական կենտրոն, այնուհետև՝ Երևան:
Սակայն վերը թվարկված վնասվածքների հետևանքով տուժողի մոտ գլխուղեղի կենսական կարևոր ֆունկցիաների խանգարում, օրգանիզմի ընդհանուր ինքնաթունավորում է առաջացել:
2016 թ. նոյեմբերի 8-ին Մամիկոն Գ.-ն առանց գիտակցության գալու երևանյան հիվանդանոցում մահացել է:
Մինչև տուժողի մահը Հակոբ Արշակյանին մեղադրանք էր առաջադրված սպանության փորձի համար՝ ՀՀ քրեական օրենսգրքի 34-104 հոդվածի 1-ին մասով: Տուժողի մահից հետո մեղադրանքը փոփոխվել է, Հակոբ Արշակյանը մեղադրվել է դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Հակոբ Արշակյանն առաջադրված մեղադրանքում իրեն մեղավոր չի ճանաչել: Նա հայտնել է, թե ցավում է կատարվածի համար, ինքը չէր ցանկանում, որ նման բան լինի: Տուժող Մամիկոնին ճանաչել է մոտ երեք տարի: Ինքը «Օլե» ակումբ հաճախել է ամիսը մի քանի անգամ: Մամիկոնի հետ նորմալ հարաբերությունների մեջ է եղել, առհասարակ իրենք խնդիրներ չեն ունեցել:
Դեպքի օրը ինքը հանդիպել է ընկերոջ՝ Միքայելի հետ, գարեջուր են խմել: Միքայելն իրեն գումար պիտի տար, տվել ու գնացել է: Ակումբ է եկել իր ընկեր Սարգիսը՝ մի անծանոթ աղջկա հետ: Ինքը նրանց շամպայն է հյուրասիրել, 10-15 րոպե նստել է նրանց սեղանի մոտ: Ակումբի տնօրեն Մամիկոնը նստած էր սեղաններից մեկի մոտ՝ հինգ-վեց հոգու հետ:
Ժամը 23-ի սահմաններում ինքը փակել է իր սկզբնական սեղանի հաշիվը՝ 12 հազար դրամ. վերցրել էր 4 շիշ գարեջուր ու 1 շիշ շամպայն, որը Սարգիսենց սեղանին էր դրել:
Արդեն ցանկանում էր դուրս գալ ակումբից, երբ նկատել է, որ Սարգիսը բարմենի հետ խոսում է՝ մոտի գումարը քիչ լինելու մասին: Հետո նա մտել է տնօրենի աշխատասենյակ: Ինքը ցանկացել է Սարգսին ասել, որ տնօրենի մոտ չմտնի, ինքը պատրաստ էր նրանց սեղանի հաշիվը փակել: Չի հասցրել ասել, այդ պատճառով Սարգսի հետևից մտել է տնօրենի աշխատասենյակ: Այնտեղ վեց-յոթ հոգի կար: Ինքը նկատել է, որ Սարգսի հետ վեճ է սկսվում: Փորձել է միջամտել: Հավաքվածներին ասել է՝ հո դուք էրեխա չե՞ք, ի՞նչ ա էղել: Իրեն չեն լսել: Ինքը չի ասել. «Ի՞նչ կապիկություն եք անում»: Մամիկոնն ասել է՝ էստեղ բազար անելու տեղ չի, դուրս էկեք աշխատասենյակից: Իրենք դուրս են եկել: Ինքը մի քիչ ուշ է դուրս եկել, որովհետև փորձել է ճշտել՝ ինչքա՞ն է Սարգսի հաշիվը: Երբ դուրս է եկել, տեսել է, որ Սարգիսը ճանապարհի մյուս կողմից ասում է՝ կգամ ձեզ կտեսնեմ: Մամիկոնն էլ ասել է՝ ում հետ ուզում ես՝ արի:
Ինքը մոտեցել է, ինքն ու Մամիկոնը «ընկերական խոսելով, վիճվելով» բարձրացել են մոտ 20 մետր: Մամիկոնը վրդովված խոսել ու հոյհոյանք է տվել, թե ո՞վ կարա գա էս օբյեկտ ու իրան սենց պահի: Այդ ժամանակ ինքը ձեռքի ափով հարվածել է Մամիկոնի դոշին, որ նա սթափվի:
Մամիկոնը հետ է գնացել, առաջ է եկել, ցանկացել է ոտքով հարվածել իրեն, չի ստացվել, նա փաթաթվել է իր գոտկատեղին:
Իր ձեռքերը գրպաններում էին: Մի գրպանում հեռախոսն էր, մյուս գրպանում ծալովի դանակ կար՝ փակ վիճակում: Ինքը առևտրով էր զբաղվում, անընդհատ փողի հետ էր գործ ունենում, ապահովության համար մոտը դանակ էր պահում:
Երբ Մամիկոնը փաթաթվել է իրեն, փորձել է իրեն վայր գցի, ինքը մի ձեռքով բռնել է եղևնուց, մյուս ձեռքով գրպանից մի բան է հանել ու աջից ձախ, վերևից ներքև՝ երկու կամ չորս անգամ հարվածել է Մամիկոնի գլխի հատվածին: Երրորդ անգամ հարվածելու ժամանակ դանակը բաց վիճակում մտել է Մամիկոնի գլխի մեջ, բայց ինքը չգիտեր, որ ձեռքինը դանակ է, ու դանակը բացվել է: Այդ ամենը վայրկյաններ է տևել: Ինքը դանակը պատահաբար է հանել, մտածել է՝ հեռախոսն է: Երրորդ հարվածից հետո Մամիկոնը թողել է իրեն, շրջվել, ձեռքը գլխին դրած՝ քայելով գնացել է դեպի ակումբ, իսկ ինքը ակումբի հակառակ կողմով է դուրս եկել: Ինքը չգիտեր, որ դանակը բացվել ու մտել է Մամիկոնի գլխի մեջ, իմացել է հաջորդ օրը: Երևի հարվածներ հասցնելու ընթացքում էր դանակը բացվել… Ինքն իրեն մեղավոր է ճանաչում կռիվ անելու համար, ինքը չէր կարող կանխատեսել, որ նման բան կարող է լինել…
Տուժողի իրավահաջորդը՝ կինը, հայտնել է, որ դեպքից հետո ամուսնուն վիրահատել են: Երբ նա գիտակցության է եկել, իրեն ասել է. «Ոնց թուլեն միամտացրեց ու խփեց…»: Ինքը չէր թողնում, որ ամուսինը շատ խոսի, բժիշկն արգելել էր դեպքի վերաբերյալ խոսել նրա հետ: Ինքը խնամում էր ամուսնուն: Վիրահատության երրորդ օրը նրա վիճակը կտրուկ վատացել է: Նա անընդհատ շարժվում էր, վիրակապը արձակվել էր, ու ինքը տեսել է, որ նրան մի քանի անգամ էին խփել…
Գործով վկա Բագրատ Հ.-ն՝ Մամիկոնի ընկերը, դեպքի պահին եղել է ակումբում: Նա հայտնել է, որ խառնաշփոթ է սկսվել, Մամիկոնը մի անծանոթ տղայի հետ դրսում խոսում էր: Հետո ինքը Մամիկոնին տեսել է նստարանին նստած՝ դանակը գլխի մեջ: Նա ասել է, թե ուզում է որդուն տեսնել: Ինքը խնդրել է, որ նա չխոսի, ուժերը խնայի: Քանի որ շտապօգնությունն ուշանում էր, ինքն է իր մեքենայով Մամիկոնին հասցրել հիվանդանոց: Նա նստած էր իր կողքի նստատեղին, ամբողջ ճանապարհին կրկնում էր, թե ուզում է տեսնել որդուն: Դանակը խրված էր նրա գլխի ձախ մասում…
Ականատես վկաները հայտնել են, որ Մամիկոնը խնդրում էր դանակը հանել գլխի միջից, ասում էր՝ ո՞նց խփեց, ո՞նց հարմարացրեց…
Դատաբժշկական փորձաքննության եզրակացությամբ՝ Մամիկոն Գ.-ի վնասվածքները՝ գլխի ձախ քունքային շրջանի՝ գանգի խոռոչ թափանցումով, ուղեղիկի վնասումով վերքի, ձախ ականջախեցու ծակած-կտրած վերքի ձևով հասցվել են ծակող-կտրող գործիքով: Գանգի խոռոչ թափանցող վնասվածքը տուժողի առողջությանը հասցրել է ծանր վնաս՝ կյանքին վտանգ սպառնացող:
Որպես Հակոբ Արշակյանի անձը բնութագրող հանգամանք՝ դատարանը հետազոտել է նաև դպրոցի տնօրենի տված, դպրոցական շարադրություն հիշեցնող բնութագիրը, որում մասնավորապես նշված էր. «Հակոբը անմիջական, ընկերասեր, առանց որևէ շահախնդրության անմիջապես օգնության հասնող ընկեր էր: Նաև ուներ բռնկվող բնավորություն: Հաճախ այդ իսկ պատճառով կխոցվեր, մի կողմ կքաշվեր: Չէր սիրում, երբ փորձում էին շրջանցելով ծածկել սխալ արարքը, սիրում էր պարզություն, նայել աչքերին ու ներողություն խնդրել և մեծահոգաբար ներել դիմացիներին՝ հայացքում միշտ ունենալով մի ջերմ ժպիտ»…
Դատարանը հաշվի է առել, որ Հակոբ Արշակյանը դատված է եղել, դատվածությունը մարված չէ: Արձանագրվել է հանցագործությունների կատարման ռեցիդիվ Հակոբ Արշակյանի կողմից:
Հակոբ Արշակյանը մեղավոր է ճանաչվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով, և դատապարտվել է 10 տարի ազատազրկման: Այս պատժին գումարվել է նաև 2014 թվին Կոտայքի մարզի ընդհանուր իրավասության դատարանի դատավճռով տուգանքի ձևով նշանակված պատժի չկրած մասը՝ 200 հազար դրամը: Վերջնական պատիժ է նշանակվել 10 տարի ազատազրկում և տուգանք՝ 200 հազար դրամի չափով: Պատժի սկիզբը՝ 2016 թվականի նոյեմբերի 24-ից:
