Հայ ազգային կոնգրեսի վերջին հանրահավաքի ժամանակ իշխանություններին մինչև սեպտեմբեր ժամանակ տրվեց ՀԱԿ-ի հետ բանակցություններ սկսելու համար, հակառակ դեպքում ՀԱԿ-ը խոստացավ արմատական քայլերի գնալ:
Այսօր Սերժ Սարգսյանի մամուլի քարտուղար Արմեն Արզումանյանը մեկնաբանել է ՀԱԿ-ի հետ իշխանությունների երկխոսության ուղղությամբ հետագա քայլերը: Նա նշել է, որ կոալիցիոն կուսակցությունները ձևավորել են համապատասխան աշխատանքային խումբ, որի կազմում ընդգրկվել են երկուական ներկայացուցիչ յուրաքանչյուր կուսակցությունից: Առաջիկա օրերին կհրապարակվի խմբի անդամների ցանկը, և առաջին աշխատանքային քննարկումը հնարավոր կլինի կազմակերպել արդեն գալիք տասնօրյակում:
«Առաջին լրատվականը» փորձեց ՀԱԿ անդամներից ճշտել, թե ո՞րն է լինելու ընդդիմության քայլը, այն դեպքում, երբ իշխանությունները ցանկանան ձգձգել բանակցությունները մինչև հերթական ընտրություններ: Հայոց համազգային շարժում կուսակցության նախագահ Արամ Մանուկյանը մեզ հետ զրույցում շեշտեց, որ ՀԱԿ-ն ասել է, որ մինչև սեպտեմբեր բոլոր հարցերը պետք է հստակեցված և պարզեցված լինեն. «Մենք չենք սպասելու սեպտեմբերին. կամ երկխոսությունը կայանում է բոլոր պայմաններով, կամ ամեն ինչ ավարտվում է, իշխանություններին մեկ-երկու ամիս ժամանակ է տրված»:
Մանուկյանը նշեց, որ բանակցությունները սեպտեմբերից հետո չեն շարունակվելու. «Մինչև սեպտեմբեր իրենք պետք է պատասխանած լինեն ՀԱԿ-ի բոլոր հարցերին: Սեպտեմբերին գործընթացը կամ ավարտվում է, կամ սկսվում է նոր գործընթացը»:
