ԱՄՆ նախագահ Բարաք Օբամայի այցը Բրյուսել բելգիացի հարկատուներին 10 մլն եվրո կարժենա: Ինչպես հայտնում է Guardian-ը, դա միջինը 20 անգամ գերազանցում է Բելգիայի մայրաքաղաքում անցկացվող մյուս գագաթնաժողովների ծախսերը:
Բրյուսելի բնակիչները սովոր են քաղաքում տարեկան առնվազն 4 եվրոպական գագաթնաժողովների անցկացման ժամանակ քաղաքում անվտանգության միջոցառումների ուժեղացմանը: Սակայն այս դեպքում անվտանգության ծախսերը գերազանցում են նույնիսկ ամենահամարձակ սպասումները: Սովորաբար նման միջոցառումների անցկացման համար բյուջեից ծախսվում է մոտ 500 հազար եվրո:
ԱՄՆ նախագահին այցի ընթացքում կուղեկցի նրա շրջապատի 900 մարդ: Մայրաքաղաքի օդանավակայանը կընդունի նաև 45 ավտոմեքենայով 3 բեռնատար օդանավեր:
Անվտանգության ծառայություներն արդեն ուսումնասիրել են Բելգիայի մայրաքաղաքի յուրաքանչյուր անկյունը, իսկ ամերիկյան ուղղաթիռներին դեռևս անցած շաբաթ էր թույլատրվել թռիչք իրականացնել քաղաքի վրայով: Անվտանգության մակարդակը քաղաքում երկրորդ մակարդակից կբարձրացվի երրորդի՝ հնարավոր չորսից:
Օբաման 2009-ին վերընտրվելուց հետո առաջին պաշտոնական այցով Բրյուսել կժամանի այսօր երեկոյան: Այցի ծրագիրը հագեցած է՝ ԵՄ-ԱՄՆ գագաթնաժողով, ՆԱՏՕ-ի գլխավոր քարտուղարի և Հյուսիսատլանտյան խորհրդի հետ հանդիպում, ընդունելություն Բելգիայի թագավորի մոտ և բանակցություններ երկրի վարչապետի հետ, և վերջապես 40-րոպեանոց ելույթ եվրաատլանտյան հարաբերությունների մասին, որն Օբաման կկարդա Բրյուսելի Գեղարվեստի պալատում:
Այդ բոլոր միջոցառումները նշանակված են մարտի 26-ին:
