Հոկտեմբերի երկրորդ կեսին Հայաստանում, Վրաստանում և Սփյուռքում ապրող մտավորականների մի խումբ պատրաստվում է հավաքվել Թբիլիսիում՝ Վերնատանը՝ առիթը Հովհաննես Թումանյանի հոբելյանն է: «Առաջին լրատվական»- ի հետ զրույցում փոխքաղաքապետ Տիգրան Վիրաբյանը նշեց, որ օրեր առաջ պաշտոնական այցով Թբիլիսիում էր, այնտեղ Թբիլիսիի փոխքաղաքապետի հետ քննարկել են մշկութային բարեկամության հարցը և այդ շրջանակում նաև Հովհաննես Թումանյանի 150-ամյակին նվիրված համատեղ միջոցառումների ընթացքը: «Որոշեցինք մեկ օրով վերականգնել Վերնատան վաղեմի ժամանակները…Միջոցառումը տեղի կունենա հոկտեմբերի 19-ին, կկազմակերպվի հայ մշակութային գործիչների այց Վրաստան, տեղի կունենա հանդիպում Վրաստանի մշակութային գործիչների հետ»:
Փոխքաղաքապետը նաև ընդգծեց, որ Թբիլիսիի փոխքաղաքապետի հետ հանդիպմանն առանձնապես կարևորվել է զբոսաշրջության ոլորտում Երևանի և Թբիլիսիի համագործակցությունը: Առաջարկվել է ստեղծել միասնական հարթակ, որտեղ կներկայացվեն երկու մայրաքաղաքները՝ որպես զբոսաշրջային ուղղություն: Տ. Վիրաբյանի հավաստմամբ՝ այս ուղղությամբ արդեն աշխատանքային խմբեր են ստեղծվում:
Անդրադառնալով Վարդավառի օրը ԱԺ բակում գորգերի լվացման ակցիային, ինչը բուռն քննադատվեց սոցցանցերում՝ գնահատվելով որպես «գեղցիություն, որը լափում է քաղաքական մշակույթը»՝ Տիգրան Վիրաբյանը նշեց. «Ցանկացած միջոցառում պահանջում է մենեջմենթ… Գորգերի լվացման փոխարեն կարելի էր միջոցառումների այլ բովանդակություն ընտրել: Վարդավառի տոնը կարելի է դիտարկել այլ բովանդակության մեջ, բայց ցանկացած միջոցառմանը հասարակությունն է տալիս գնահատական: Կարծում եմ՝ այլ ձևաչափ կարելի էր ընտրել»:
Մանարամասն՝ տեսանյութում:
