Լուրեր
Այլանդակ ձևով ենք վերաբերում մեր երկրին․ Ռուբեն Բաբայան

«Միշտ պետք է հաշվի առնել, որ մարդը փոփոխական է, ամենավտանգավոր բանը մարդուն փորձության ենթարկելն է, ավելի լավ է դա չանել, այլ փոխել համակարգը: Պարզապես հույս դնել, որ կազատվենք անբարեխիղճ պետական գործիչներից, և նրանց կփոխարինեն ազնիվ գործիչները՝ պահպանելով նույն համակարգը, կարծում եմ`միամտություն է. համակարգն է հաճախակի թելադրում ոչ ազնիվ լինել, այդպիսի համակարգը պետք է փոխվի…»,- «Առաջին լրատվական»- ի հետ զրույցում այս մասին ասաց Երևանի տիկնիկային թատրոնի տնօրեն Ռուբեն Բաբայանը:

Նրա կարծիքով՝ պետական կառավարման մեջ շատ կարևոր է նաև բալանսավորումը. «Չի կարելի հույս դնել միայն նրա վրա, որ այս իշխանությունն արդար է, ազնիվ է և ենթական չէ վերահսկողության: Բոլոր պետական կառույցները պետք է կարողանան միմյանց նկատմամբ որոշակի վերահսկողություն իրականացնել: Վերահսկողությունն անվստահություն չէ, այլ պետական կառավարման ամենաարդյունավետ միջոցն է»:

Անդրադառնալով իշխանությունների դեմ բարձրացած բողոքի ալիքին, որ տեղի ունեցավ Իջևանում՝ Ռուբեն Բաբայանը նկատեց. «Որևէ արդարացում չկա գողությանը: Պատճառաբանությունը, որ օրվա «հացի փող» են աշխատում, յուրաքանչյուր գողության արդարացումն է, և դա շատ հարաբերական հասկացություն է, մեկի համար «հացի փողը» անձնական օգտագործման մեքենան է, մյուսի համար իսկապես հացն է… Իրականում պետք է փոխվի հոգեբանությունը. «Եկեք մեզ տեր կանգնեք, եկեք մեզ կերակրեք, մեզ համար աշխատատեղ ստեղծեք». այս հոգեբանությունը պետք է փոխվի:

Մենք այլանդակ ձևով ենք վերաբերվում մեր երկրին, մենք մեզ երկրի տերը չենք զգում: Կարծես թե անհեռատես ենք և չենք հասկանում, թե ինչ կկատարվի մեր շուրջը՝ այդ անտառները կտրելով, էկոլոգիական բազմաթիվ խնդիներ ստեղծելով. այնպիսի տպավորություն է, որ վաղը, մյուս օրը մեր երեխաներն այստեղ չեն ապրելու, այսինքն՝ մենք չենք տեսնում այդ «քաղցկեղի» ահավոր զարգացումը Հայաստանում… Այս հեղափոխությունը ես առաջին հերթին ընդունեցի, քանի որ այն տալիս է լիակատար հնարավորություն տեր լինել սեփական ճակատագրին, սեփական երկրին: Եթե մենք պետք է շարունակենք լինել խնդրողի դերում, հեղափոխությունը դառնում է անիմաստ»:

Մանրամասն՝ տեսանյութում:

  • Դիտումներ՝ *