Ղազախստանի վարչապետ Քարիմ Մասիմովին առաջարկել են Շիմքենդ շրջանում տարածված առնետների դեմ պայքարել կատուներ ներկրելով: Վարչապետի բլոգում ոմն Ալինուրա Կոնարբաևան գրել է, որ կրծողներին վերացնելու համար անհրաժեշտ է օգտագործել կատուներ, ինչպես նաև շներ: Անհրաժեշտության դեպքում էլ դրանց պետք է ներկրել: Այս մասին հաղորդում է Lenta.ru կայքը:
Ղազախական հեռուստաընկերությունները վերջերս սարսափեցնող լուրեր են հաղորդում այդ շրջանից՝ նշելով, որ կրծողների թիվը հասել է աղետալի չափերի: «Եղել են շատ դեպքեր, երբ առնետները հարձակվել են փողոցային կենդանիների վրա, իսկ վերջերս՝ նաև մարդու»,- ասում են նրանք: Տեղի մասնագետները նշում են, որ աղետի դեմն առնելու համար անհրաժեշտ է ծախսել միլիոնավոր դոլարներ:
Ալինուրա Կոնարբաևան գրել է, որ կատուներին «ներգրավելով» այս գործում՝ հնարավոր կլինի խնայել մեծ գումարներ: Նա առաջարկել է գործի դնել այն փողոցային կենդանիներին, որոնց հավաքում են փողոցներում և ուղարկում սպանդարաններ: Նա կարծում է, որ այդ կենդանիներին կարելի է ստերիլիզացիայի ենթարկել և ուղղել կրծողների դեմ պայքարի: