Թբիլիսին արձագանքել է ՆԱՏՕ-ի և Ռուսաստանի համագործակցության դադարեցմանը Ուկրաինայում տեղի ունեցող իրադարձությունների պատճառով և առաջարկել է Վրաստանի տարածքն օգտագործել 2015թ. զինվորականներին և բեռները Աֆղանստանից դուրս բերելու համար:
Փաթեթը փոխանցվել է ԱՄՆ ռազմատրանսպորտային հրամանատարությանը և Հյուսիսատլանտյան դաշինքի շտաբ-գրասենյակին: Այս մասին հաղորդում է «Իզվեստիա»-ն՝ վկայակոչելով Վրաստանի ՊՆ-ի բարձրաստիճան պաշտոնյային:
Նախնական առաջարկներում, որոնք ձևակերպվել էին փետրվարի սկզբին ՆԱՏՕ-ի ռազմական կոմիտեի՝ Վրաստան այցի կապակցությամբ, շեշտադրումը դրվում էր Փոթիի և Բաթումի սևծովյան նավահանգիստների վրա: Այժմ Ադրբեջանի և Թուրքիայի հետ նախնական պայմանավորվածությունների հիման վրա քննարկվում է նոր երկաթուղու ներուժը, որը երեք երկրները կկապի իրար: Թբիլիսին խոսում է նոր երթուղու անվտանգության և տնտեսման մասին:
Բացի այդ, Վրաստանը ՆԱՏՕ-ի բեռների համար պատրաստ է տրամադրել նաև իր օդանավակայանները: Տեղի փորձագետների հաշվարկներով՝ վրացական գանձարանը նման տարանցիկ ուղու համար կստանա մինչև 100 միլիոն դոլար:
