Այսօր «Բարգավաճ Հայաստան» կուսակցությունից փորձեցինք հետաքրքրվել, թե կուսակցությունը պատրա՞ստ է, արդյոք, արտահերթ ընտրություններին: Եթե արտահերթ ընտրություն լինի, ԲՀԿ-ն կհասցնի՞ արագ անցնել նախընտրական ռեժիմի: Եթե այո, հնարավոր չէ՞ արդյոք, որ ԲՀԿ-ին ինչ-որ պահի ավելի ձեռնտու լինի արտահերթ ընտրությունը, քան հերթականը: Հերթականի դեպքում իշխանությունն անելու է առավելագույնը իր սցենարով այդ ընտրությունը իրականացնելու համար, արտահերթի դեպքում հնարավոր կլինի այդ սցենարը նվազագույնի հասցնել: Այսինքն՝ արտահերթ ընտրությունները կնպաստեն ընտրակեղծիքների բացառմանը:
ԱԺ ԲՀԿ-ական պատգամավոր Վարդան Բոստանջյանը մեզ հետ զրույցում նշեց, որ դա շատ մշուշոտ հարց է: Նույնիսկ ո՛չ աջից, ո՛չ ձախից պատասխանելու նյութ չկա: Բացի դա, կուսակցությունը այդ թեմաները նույնիսկ չի էլ արծարծել, հետևաբար այդ հարցի պատասխանը կարող է տալ միայն կուսակցության նախագահ Գագիկ Ծառուկյանը:
Ինչ վերաբերում է «Հանրապետական» կուսակցությանը՝ նշեց, որ այդ կուսակցությունը իր գաղափարախոսությամբ, իր վարած քաղաքականությամբ, իր ամեն ինչով որևէ մի հակամարդկային, հակապետական բան չի անում, որ արտահերթ ընտրությունների անհրաժեշտություն ծագի: