Համացանցային կապի հայտնի Skype համակարգը պատրաստ է համագործակցել Ռուսաստանի անվտանգության դաշնային ծառայության հետ: Համացանցային այս համակարգը, որը համարվում է «լսվելուց» պաշտպանված, պատրաստ է տրամադրել որոշ ինֆորմացիա իր օգտատերերի մասին,- փոխանցում է Gazeta.ru կայքը:
Ինչպես նշել է Skype-ի Ռուսաստանի մասնաճյուղի մամլո խոսնակ Արսենի Ռաստորգուևը, պետք է գոյություն ունենա հստակ իրավաբանական գործընթաց հատուկ ծառայությունների և համացանցային համակարգերի համագործակցության համար:
ԱԴԾ-ն վաղուց է ցանկանում տեղեկություններ ստանալ այս համակարգից: Համակարգը կոդավորման համար օգտագործում է արևմտյան գաղտնագրման ալգորիթմներ, որոնք ռուսական հատուկ ծառայությունները չեն կարողանում կոտրել: Այս իրադարձությունն իր գագաթնակետին է հասել ապրիլին: Այդ ժամանակ ԱԴԾ-ում սկսել էին խոսել, որ Ռուսաստանի տարածքում կարգելեն Skype-ը, Gmail-ը և Hotmail-ը, քանի որ ահաբեկիչները կարող են միմյանց հետ կապ հաստատել այս համակարգերի օգնությամբ: Մեծ աղմուկ բարձրացավ, որից հետո ԱԴԾ շտապեց հայտարարել, որ չի փակի այս համակարգերը:
«Ինչպես և ես ասում էի, սա էլ աղտոտեցին: Սպառում եմ հաշվիս եղած վերջին ցենտը և ընդմիշտ ջնջում եմ այս դավաճան ծրագիրը համակարգչից ու հեռախոսից: Skype-ը նաև իմ կողմից կստանա բացասական գնահատական՝ 1 աստղիկի տեսքով»,- գրում է westsomething-ը:
«Չէի սպասում Skype-ից նման բան: Այն միանգամից դարձավ տհաճ: Եթե կոդերը տրամադրի ԱԴԾ աշխատակիցներին, ես միանգամից կջնջեմ այն համակարգչից»,- սպառնում է eighttimes-ը: