«Հրապարակ»-ը գրում է. «Հայաստանի պետական ճարտարագիտական համալսարանի ռեկտորի ժամանակավոր պաշտոնակատար Հովհաննես Թոքմաջյանը ոչ կոռեկտ է համարում իր նախորդի՝ Արա Ավետիսյանի կատարած չարաշահումների ու կոռուպցիոն բացահայտումների վերաբերյալ իրեն ուղղված հարցերը: «Ես ոչնչից տեղյակ չեմ, ես ոչինչ չգիտեմ»,-մեզ հետ զրույցում ասաց Թոքմաջյանը: Նա հավաստիացրեց, որ Արա Ավետիսյանից հետո պաշտոնավարելու որևէ խնդիր չի ունենա: «Ինձ առաջարկել են մարտի 17-ին, ես առաջարկն ընդունել եմ»,-սահմանափակվեց նա:
Հիշեցնենք, որ Պոլիտեխնիկը և Երևանի պետական ճարտարապետաշինարարական համալսարանը միավորվում են 25 տարվա բաժանումից հետո, իսկ ռեկտորի ժամանակավոր պաշտոնակատար է նշանակվել Հովհաննես Թոքմաջյանը, ով, ամենայն հավանականությամբ, կշարունակի պաշտոնավարել նաև ռեկտորի «ընտրությունից» հետո: Ի՞նչը ստիպեց միավորել բուհերը՝ դիմորդների քանակի, մասնագիտությունների պահանջարկի նվազո՞ւմն էր պատճառը, թե՞ այլ հարցեր կային: Թոքմաջյանը նշեց, որ այն պայմանավորված էր միայն Բոլոնիայի ծրագրի գործընթացներով:
«Եվրոպայում տեղի են ունենում բոլոնյան ծրագրից բխող գործընթացներ, ու փոքր բուհերի խոշորացման, ինչպես նաև մասնագիտությունների խոշորացման խնդիրն արդիական է երկաստիճան բուհերի պարագայում՝ բակալավրիատ, մագիստրատուրա, որտեղ էապես փոփոխություններ են լինում կրթության հետ կապված: Այս համատեքստում էլ գիտական ներուժը միավորվեց»: Ինչ վերաբերում է ուսանողների քանակին, նա պնդեց, որ նվազում չի եղել: Բուհերի միավորումը տեխնիկական, ֆինանսական և կադրային ռեսուրսի առումով բազմաթիվ խնդիրներ ու ծախսեր է առաջ բերելու: Բուհերի աշխատակազմի շրջանում մտահոգություններ կան, որ կադրային կրճատումներ կլինեն:»,–գրում է թերթը։
Մանրամասները՝ թերթի այսօրվա համարում։
