Ռուսաստանը սկսել է S-400 համակարգերի մատակարարումը Թուրքիա, 8 բեռնատար ինքնաթիռ է ուղարկվել՝ S-400-ների մասերը մատակարարելու նպատակով։ Այս մասին ասվում է Թուրքիայի ՊՆ-ի հաղորդագրության մեջ, լուրը հաստատվել է նաև Ռուսաստանի պաշտպանության նախարարության կողմից: Բնական է, որ այս ֆոնին ավելի են սրվում թուրք-ամերիկյան հարաբերությունները: Թեմայի շուրջ «Առաջին լրատվական»-ը զրուցել է «Օրբելի» կենտրոնի փորձագետներ Կարեն Վերանյանի և Սոնա Սուքիասյանի հետ:
«Գործընթացը շարունակվում է, լուրերով պաշտոնապես հաստատվեցին, որ պահեստամասեր, սարքավորումներ, արձակման կայաններ արդեն իսկ տեղակայվել են նախկին «Աքընջը» ռազմաբազայում: Իսրայելական կողմը չհապաղեց, շատ արագ կերպով տիեզերքից արված լուսանկարներ հրապարակեցին, որոնք ցույց են տալիս, որ իրոք թուրքական կողմը ստացել է համակարգերի առաջին խմբաքանակը: Այս առումով գործարքը կայացել է, բայց չենք կարող բացառել, որ կարող են ֆորս-մաժորային իրավիճակներ լինել»,- ասաց Կարեն Վերանյանը:
Սուքիասյանն իր հերթին նշեց, որ գործարքը շատ կարևոր է Թուրքիայի համար, վերջինս տարիներ շարունակ ունի հեռահար ՀՕՊ համակարգերի խնդիր, իսկ հիմա փորձեր են արվում սեփական հեռահար ՀՕՊ համակարգերի ստեղծման ուղղությամբ: «Կնքված գործարքը ռազմական տեսանկյունից շատ կարևոր է Թուրքիայի համար, որն ունի Սիրիայի խնդիրը, ինչպես նաև կա Միջերկրական ծովի խնդիրը, որտեղ հատկապես վերջին շրջանում լարվել է իրավիճակը հատկապես Կիպրոսի տարածքում հորատման աշխատանքների հետ»:
Անդրադառնալով S -400 համակարգերի տեղակայման հարցին՝ մեր զրուցակիցները չբացառեցին, որ հնարավոր է Թուրքիան օրերից մի օր որոշում կայացնի դրանք տեղակայել Հայաստանի հետ սահմանին: «4 միավոր տեխնիկայի մասին է խոսք գնում, 400 կիլոմետր թիրախի խոցման հնարավորություն ունի և 600 կիլոմետր ռադարային հնարավորություն՝ թիրախի հայտնաբերման առումով, այսինքն՝ բավականին մեծ տիրույթ է զբաղեցնում: Եթե համակարգը տեղակայվի Թուրքիայի կենտրոնական հատվածներում, ապա կծածկի Հարավային Կովկասի զգալի տարածքը…
Այսօրվա դրությամբ շատ կարևոր հարց է մնում օդում կախված. արդյոք Մոսկվան Անկարայի հետ գնացե՞լ է որոշակի պայմանավորվածության, որպեսզի երկու երկրների ՀՕՊ համակարգերը փորձեն պահպանել բալանսը Հարավային Կովկասում՝ չխոչընդոտելով միմյանց… Չի բացառվում, որ Թուրքիան օրերից մի օր որոշի, որ Սիրիայից ու Արևելյան Միջերկրականից բացի՝ պետք է նաև հսկողություն սահմանի Հայաստանի կամ Աջարիայի նկատմամբ: Այս հարցն օդում առկախված է: Ոչ մի երաշխիք չկա, որ չի լինի»,- ասաց Վերանյանը:
Առավել մանրամասն՝ տեսանյութում:
