Միջազգային հանրապետական ինստիտուտը սոցիոլոգիական հետազոտություն է անցկացրել Հայաստանում, և ըստ հարցման արդյունքների՝ գործող իշխանության նկատմամբ կա վստահության անկում: Հայկական սոցիոլոգիական ասոցիացիայի նախագահ Գևորգ Պողոսյանը կարծում է, որ Նիկոլ Փաշինյանի վարկանիշի անկման հարցում որոշակի դեր է խաղացել նրա թիմը: Թեման քննարկելու համար «Առաջին լրատվական»-ը հյուրընկալել է քաղտեխնոլոգ Կարեն Քոչարյանին և քաղաքագետ, «Ժողովրդավարական համախմբում» նախաձեռնության համահիմնադիր Սուրեն Պետրոսյանին:
Կարեն Քոչարյանը օբյեկտիվ է համարում վարկանիշի այս անկումը. «Յուրաքանչյուր իշխանության մոտ եկած օրվանից հետո անկում է սկսվում: Նիկոլ Փաշինյանը դեռ ունի վստահության պաշար, ինչը չունի իր թիմը»:
Քաղտեխնոլոգը, սակայն, համարում է, որ Նիկոլ Փաշինյանի թիմը երբեք չի էլ ունեցել վարկանիշ. «Այդ թիմին չեն էլ ճանաչել: Եղել է Նիկոլ Փաշինյան, և եղել են մարդիկ, որոնց ինքն առաջարկել է, և Նիկոլ Փաշինյանի միջոցով էլ հասարակությունը վստահել է: Բայց հիմա քանի որ այդ թիմը հաճախ է երևում հանրային հարթակներում, թիմի մի մասը բարձրացնում է Նիկոլ Փաշինյանի վարկանիշը, մյուս մասը, գցելով իրեն, գցում է նաև Նիկոլին»:
Սուրեն Պետրոսյանն էլ կարևորեց լեգիտիմության բաշխումը դերակատարների միջև. «Իսկ բաշխելու համար թիմի բոլոր դերակատարները պետք է գոնե իրենց ոլորտներում կրեն պատասխանատվություն: Սակայն եթե անկեղծ լինենք՝ սա մեկ մարդու լեգիտիմություն է, մինչդեռ լեգիտիմությունը պետք է լինի ոչ միայն անձի, այլև գործընթացների: Ես կարծում եմ՝ այստեղ փոքր-ինչ խնդիրներ են սկսում ձևավորվել»:
Ինչ վերաբերում է նախագահ Արմեն Սարգսյանի վարկանիշին, Կարեն Քոչարյանն ասաց. «Նախագահ Սարգսյանի PR-ը արվում է ամենաբարձր մակարդակով և լուրջ պրոֆեսիոնալների կողմից: Ես կարծում եմ՝ դա անգամ այստեղից չի արվում. թիմ կա, որը դրսից է»:
Հարցազրույցն ամբողջությամբ՝ տեսանյութում: